Արա Բաբլոյանին հավանաբար չեն կալանավորել, քանի-որ նա ավելի շատ հեղինակություն ունի. Ա. Բաբայան
Հավանաբար, չեն կալանավորել ԱԺ նախկին նախագահ Արա Բաբլոյանին, որովհետև նա ինձանից մեծ է, ավելի շատ հեղինակություն ունի: Այս մասին լրագրողների հետ հանդիպմանը հայտարարեց ԱԺ աշխատակազմի ղեկավարի նախկին տեղակալ Արսեն Բաբայանը` անդրադառնալով հարցին, թե ինչու ի տարբերություն իրեն՝ Բաբլոյանին չձերբակալեցին կամ կալանավորեցին` հաշվի առնելով, որ վերջինս իշխանությունը յուրացնելու կասկածանքով որպես կասկածյալ ներգրավել է ՀՔԾ-ում քննվող քրեական գործով:
«Եթե փորձ արվեր այս խայտառակ պրոցեսների մեջ նրան ներգրավել, նույնքան ապօրինություն իրականացնել Բաբլոյանի նկատմամբ, մենք շատ ավելի արագ խայտառակ կլինեինք, քան կլինենք հետագայում»,-նշեց Բաբայանը:
Հիշեցնենք` ՀՔԾ մամուլի ծառայությունից հայտնել էին, որ ՀՀ հատուկ քննչական ծառայությունում քննվող քրեական գործով որպես կասկածյալ է ներգրավվել ՀՀ ԱԺ նախկին նախագահ Արա Բաբլոյանը` իշխանությունը յուրացնելու կասկածանքով, իսկ Արսեն Բաբայանին մեղադրանք է առաջադրվել ՀՀ քրեական օրենսգրքի 38-300-րդ հոդվածի 1-ին մասով և 314-րդ հոդվածի 1-ին մասով նախատեսված այն հանցավոր արարքների կատարման համար, որ նա, 2018 թվականին հանդիսանալով ՀՀ ազգային ժողովի աշխատակազմի ղեկավարի տեղակալի պաշտոնակատար, օժանդակել է մի խումբ պաշտոնատար անձանց կողմից Սահմանադրական դատարանի լիազորություններին տիրանալուն, ինչպես նաև կատարել է պաշտոնեական կեղծիք: Բաբայանը ձերբակալվել, այնուհետև կալանավորվել էր:
Ավելի ուշ, ՀՀ գլխավոր դատախազի խորհրդական Գոռ Աբրահամյանը հայտնել էր, որ «Հայաստանի Հելսինկյան կոմիտե» հասարակական կազմակերպության նախագահ Ավետիք Իշխանյանի և ՀՀ ԱԺ պատգամավոր Սիսակ Գաբրիելյանի կողմից ներկայացվել է մեղադրյալ Արսեն Բաբայանի որպես խափանման միջոց անձնական երաշխավորությունը կիրառելու վերաբերյալ դիմումներ՝ որպես երաշխիքի գումար, 500.000-ական ՀՀ դրամ փոխանցելու վերաբերյալ անդորրագրերի պատճենների հետ միասին՝ 2019 թվականի նոյեմբերի 12-ին որոշում է կայացվել մեղադրյալ Արսեն Բաբայանի նկատմամբ կիրառված խափանման միջոց կալանավորումը փոփոխելու և նրա նկատմամբ որպես խափանման միջոց անձնական երաշխավորությունը կիրառելու վերաբերյալ: