Աշխարհի ամենահարուստ մարդիկ 117 մլրդ դոլար են կորցրել մեկ օրում
Մոլորակի ամենահարուստ մարդիկ ավելի քան 100 մլրդ դոլար են կորցրել ֆինանսական շուկաներում գրանցված անկումների պատճառով:
Ինչպես տեղեկացնում է Bloomberg գործակալությունը, 500 ամենահարուստ գործարարները, ընդհանուր առմամբ, 117 մլրդ դոլար են կորցրել: Մասնավորապես, Amazon-ի հիմնադիր Ջեֆ Բեզոսը շուրջ 3.5 մլրդ դոլար է կորցրել, Louis Vuitton Moеt Hennessy ընկերությունների խմբի նախագահ Բեռնար Առնոն՝ 4 մլրդ, Facebook-ի հիմնադիր Մարկ Ցուկերբերգը՝ 2.7 մլրդ դոլար:
Շուկաներում գրանցված անկումը Bloomberg-ը բացատրել է Չինաստանի և ԱՄՆ-ի միջև առևտրային հարաբերությունների լարվածությամբ:
Հիշեցնենք, որ օգոստոսի 1-ին ԱՄՆ նախագահ Դոնալդ Թրամփը հայտարարել էր, որ Վաշինգտոնը սեպտեմբերից 10 տոկոս հավելյալ մաքսատուրքեր է սահմանելու Չինաստանից ներկրվող 300 մլրդ դոլար արժողությամբ ապրանքների նկատմամբ:
Այս որոշմանն ի պատասխան՝ Չինաստանը նախօրեին դադարեցրել է ամերիկյան գյուղատնտեսական արտադրանքի ներկրումը և չի բացառել դրանց նկատմամբ նոր մաքսատուրքերի սահմանումը: