Կատվին սատկացնելու համար Սոչիում 2 հայ թշնամացել են
ՌԴ Սոչի քաղաքի բնակիչ Աշոտ Հարությունյանը Ոստիկանություն հաղորդում է ներկայացրել իր հարևանի՝ Սերգեյ Բոյաջյանի դեմ, որը կրակել է նրա կատվի վրա։
Բոյաջյանի խոսքերով՝ նա գնացել էր այդ քայլին, քանի որ «կատուն» գողացել էր իր ճտերին։
«Սատկած կատվին Բոյաջյանը երեխաների ներկայությամբ դրել է փաթեթի մեջ և թողել մեքենայի մեջ։ Ես վերցրեցի կատվին և զանգահարեցի ոստիկանություն։ Ինձ խորհուրդ տվեցին կատվին դնել սառնարանի մեջ, մինչև քրեագետը ժամանի։ Իրականում սա առաջին դեպքը չէ։ Հարևանս այդպես սատկացրել է նաև շանը, այլ կատուների և թռչունների, որոնք իր բակում են հայտնվել»,- Հարությունյանի խոսքերն է մեջբերում «Комсомольская правда»-ն։
Աշոտ Հարությունյանը հայտնել է նաև, որ պատրաստվում է դիմել դատարան՝ հարևանին ծնողական իրավունքներից զրկելու համար, քանի որ կենդանիների նկատմամբ բազմիցս Բոյաջյանի դաժան վերաբերմունքի ականատեսն են եղել նրա երեխաները։