Մոսկվայում ՌԴ, ՀՀ և Ադրբեջանի ԱԳ նախարարների կայանալիք հանդիպումը նվիրված կլինի ԼՂ հիմնախնդրի կարգավորման շուրջ քննարկումներին. Մարիա Զախարովա
Ռուսաստանի Դաշնության ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ հայտնել է, որ ապրիլի 15-ին Մոսկվայում եռակողմ հանդիպում կանցկացվի ՌԴ, Հայաստանի և Ադրբեջանի ԱԳ նախարարներ Սերգեյ Լավրովի, Զոհրաբ Մնացականյանի և Էլմար Մամեդյարովի միջև:
Ինչպես Զախարովան նշել է, հանդիպումը նվիրված կլինի ԼՂ հիմնախնդրի կարգավորման շուրջ քննարկումներին, որոնց ներկա կլինեն նաև ԵԱՀԿ Մինսկի խմբի համանախագահները:
ԱԳՆ ներկայացուցիչը պատասխանել է նաև լրագրողի հարցին Վիեննայում կայացած Փաշինյան-Ալիև բանակցություններից հետո համատեղ մարդասիրական նախագծերի իրականացման անհրաժեշտության հայտարարության մասին՝ անդրադառնալով Ղարաբաղի օդային տարածքը միջազգային ավիաչվերթների համար բացելու և Սարսանգի ջրամբարի ռեսուրսները երկկողմ օգտագործելու մասին առաջարկներին և դրանց դերակատարությանը ԼՂ հիմնախնդրի խաղաղ կարգավորման հարցում:
«Կարծում եմ, որ առաջին հերթին այդ նախաձեռնությունը, ինչպես նաև մյուսները պետք է նախ գնահատեն հակամարտության կողմերը, այնուհետև եթե անհրաժեշտ լինի այլ երկրների կամ համանախագահների մասնակցությունը, այդ հարցը նույնպես կարող է քննարկվել նաև առաջիկայում Մոսկվայում կայանալիք հանդիպմանը», - հավելել է Զախարովան: