ԱՄՆ-ում տղամարդն իր 2 մետր հասակով միասապատ ուղտի հետ շրջել է խանութում (տեսանյութ)
ԱՄՆ Միչիգան նահանգի Մասկեգոն քաղաքում Սքոթ Լյուիս անունով տղամարդն իր 11-ամյա ուղտի հետ շրջել է կենդանիների համար նախատեսված ապրանքների PetSmart խանութում, գրում է Daily Mail-ը:
Հիսնամյա տղամարդու խոսքով՝ նա կենդանուն իր հետ խանութ է տարել, որպեսզի այն քիչ-քիչ սովորի ծածկասայլով շրջելուն:
Հայտնի է, որ Սքոթը Ջեֆրի անունով ուղտին մեծացրել է մոտակայքում գտնվող Lewis Farms & Petting կենդանաբանական այգում: Այգու աշխատակիցներից մեկը, որը նկարահանել է ուղտի և դրա տիրոջ «զբոսանքը», լրագրողներին պատմել է, որ Ջեֆրին շատ ընկերասեր կենդանի է և որ նրան դուր է եկել խանութ կատարած այցը:
Խանութի կանոնադրության համաձայն՝ այնտեղ կարող են մուտք գործել միայն ցուցակում ներառված կենդանիները, որոնք, սովորաբար, չափսերով փոքր են՝ շներ, կատուներ և այլն, սակայն, հուրախություն միասապատ ուղտի տիրոջ, խանութի աշխատակիցներն իրենց 2 մետր հասակով «հաճախորդի» համար բացառություն են արել: