Թրամփը վաղը կստորագրի Գոլանի բարձունքներն Իսրայելի տարածք ճանաչելու հրամանագիրը. Իսրայելի ԱԳՆ
ԱՄՆ նախագահ Դոնալդ Թրամփը Գոլանի բարձունքներն Իսրայելական տարածք ճանաչող փաստաթուղթը կստորագրի երկուշաբթի՝ մարտի 25-ին: Ինչպես փոխանցում է ТАСС գործակալությունը, նման տեղեկություն է հայտնել Իսրայելի ԱԳ նախարար Իսրայել Կացը:
«Վաղը նախագահ Թրամփը վարչապետ Բենյամին Նեթանյահուի ներկայությամբ հրամանագիր կստորագրի Գոլանի բարձունքներում Իսրայելի ինքնիշխանության ճանաչման վերաբերյալ»,- աղբյուրը մեջբերում է իսրայելցի նախարարին: Նրա խոսքով՝ Իսրայելի և ԱՄՆ-ի հարաբերություններն ամուր են, ինչպես երբևէ:
Հիշեցնենք, որ Թրամփն օրեր առաջ հայտարարել էր, որ ԱՄՆ-ի համար եկել է ժամանակը Գոլանի բարձունքներն իսրայելական տարածք ճանաչելու համար, ինչը, նրա կարծիքով, ռազմավարական նշանակություն ունի երկրի անվտանգության համար:
Ռուսաստանը, Գերմանիան, Իրանը, Սիրիան և Ֆրանսիան դեմ են արտահայտվել նման միակողմանի գործողություններին: Ավելի վաղ հայտնի էր դարձել, որ իսրայելցի վարչապետը մեկնում է ԱՄՆ: ԱՄՆ առաջնորդը նրան Սպիտակ տանը կընդունի մարտի 25-26-ը: