Թուրքիայում դատի են տվել դպրոցի ուսուցչի՝ Աթաթուրքին «բրիտանացի լրտես» անվանելու համար
Թուրքիայում հանրապետության հիմնադիր Մուստաֆա Քեմալ Աթաթուրքին վիրավորելու հոդվածով դատի են տվել ուսուցչի, որը հայտարարել է, թե Աթաթուրքն իրականում բրիտանացի լրտես էր, այս մասին գրում է թուրքական «Ջումհուրիյեթ» պարբերականը:
Նշվում է, որ միջնակարգ դպրոցի ուսուցիչը ուսուցչանոցում մյուս գործընկերների ներկայությամբ Աթաթուրքին նսեմացնող արտահայտություններ է արել, մեղադրել օսմանյան տիրապետության տակ գտնված մի շարք կղզիներ Հունաստանին հանձնելու համար ու «լրտես» անվանել նրան:
«Աթաթուրքն աթեիստ էր, բրիտանացի լրտես: Նրա հոր անունը հայտնի է, սակայն թե ով էր պապը՝ ոչ ոք չգիտի: Երբ նրա վերաբերյալ քննադատության արգելքը վերանա՝ կտեսնեք, թե ով էր նա»,-ըստ մեղադրող կողմի՝ ասել է ուսուցիչը:
Դրանից հետո ուսուցչի դեմ հայց է ներկայացվել դատարան, և նա ստիպված է եղել ցուցմունք տալ ոստիկանությունում: Նա պնդել է, որ Թուրքիայի Հանրապետության հիմնադրի մասին նման արտահայտություններ իրեն թույլ տալ չէր կարող, իսկ իր դեմ հայցը գործընկերների դրսևորած նախանձի հետևանք է: