Թրամփը հայտարարել է, որ կօգտագործի վետոյի իր իրավունքը, եթե պալատը դեմ քվեարկի արտակարգ դրություն մտցնելու որոշմանը
Միացյալ Նահանգների նախագահ Դոնալդ Թրամփը հայտարարել է, որ կօգտագործի վետոյի իր իրավունքը, եթե Կոնգրեսի Ներկայացուցիչների պալատը դեմ քվեարկի Մեքսիկայի հետ սահմանին արտակարգ դրություն մտցնելու որոշմանը, այս մասին հայտնում է Associated Press-ը:
«Արդյոք կօգտագործե՞մ վետոյի իմ իրավունքը: 100 տոկոս», - ասել է Թրամփը:
Արտակարգ դրության սահմանման դեպքում Թրամփը կկարողանա ապահովել Մեքսիկայի հետ սահմանին պատի կառուցման համար անհրաժեշտ ֆինանսավորումը: Նշվում է, որ արտակարգ դրություն սահմանելու դեպքում սահմանին պատի զգալի մասը պատրաստ կլինի արդեն 2020 թվականի սեպտեմբերին, այսինքն՝ մինչ ԱՄՆ նախագահական ընտրությունների անցկացումը:
Թրամփը կարող է օգտագործել ԱՄՆ ցամաքային ուժերի ինժեներական կորպուսի համար նախատեսված ֆոնդի մի մասը, իսկ այն կազմում է 13,9 միլիարդ դոլար: Այս գումարը նախատեսված է նաև տարերային աղետներից տուժած շրջաններին օգնություն ցուցաբերելու համար:
Անօրինական ներգաղթյալների հոսքը կանգնեցնելու համար Մեքսիկայի հետ սահմանին պատի կառուցումը Թրամփի նախընտրական խոստումներից է: