Փաշինյանը Բոլթոնի հետ զրուցել է ամեն ինչից, բայց ոչ Արցախի խնդրի մասին
Վարչապետ Նիկոլ Փաշինյանն այսօր՝ հունվարի 23–ին, հեռախոսազրույց է ունեցել ԱՄՆ նախագահի ազգային անվտանգության հարցերով խորհրդական Ջոն Բոլթոնի հետ:
Փաշինյանն այս առնչությամբ իր ֆեյսբուքյան էջում գրել է. «Քննարկեցինք տարածաշրջանային իրավիճակին եւ երկկողմ հարաբերություններին վերաբերվող հարցեր:
Թե պարոն Բոլթոնը, թե ես ընդգծեցինք հայ-ամերիկյան հարաբերությունների կարեւորությունը մեր կառավարությունների համար:
Պայմանավորվեցինք շարունակել քննարկումները մեր հարաբերությունների հետագա զարգացման շուրջ:
Հ.Գ. Արցախի հարցին անդրադարձ չի եղել»:
Եւ հետաքրքիր է, թե այդ ինչ տարածաշրջանային հարցեր են քննարկվել, որ տեղ չի մնացել Արցախի խնդրին: Գուցե Իրանի միջուկային ծրագրի մասին են խոսել, գուցե աբխազական հիմնահարցի կամ Ղրիմի, իսկ գուցե Սիրիայի խնդրին է անդրադարձ եղել եւ Թուրքիայի քրդերի եւ Անկարայի միջեւ փոխհարաբերություններին:
Իրոք, տարօրինակ ժամանակներ են, տարօրինակ բարքեր: Մեկուկես ժամանոց հանդիպում Ալիեւի հետ եւ զրոյական տեղեկատվություն քննարկված հարցերի մասին:
Մամեդյարովի հետ Մնացականյանը մի քանի ժամ խոսում է եւ դարձյալ ոչ մի տեղեկատվություն:
Հիմա էլ Բոլթոնի հետ հեռախոսազրույց եւ անհասկանալի ձեւակերպումով տեղեկատվություն:
Top-News.am