ԵՄ-ն նոր պատժամիջոցներ է սահմանել ՌԴ-ի և Սիրիայի քաղաքացիների հանդեպ
Այսօր Եվրամիության անդամ պետությունների արտաքին գործերի նախարարները Բրյուսելում համաձայնեցրել են Ռուսաստանի 4 և Սիրիայի 5 քաղաքացիների, ինչպես նաև սիրիական 1 ընկերության հանդեպ պատժամիջոցները: Այս մասին հայտնում է Корреспондент պարբերականը:
Պատժամիջոցները սահմանվել են ռուս նախկին լրտես Սերգեյ Սկրիպալի և նրա դստեր թունավորման, ինչպես նաև Սիրիայում քիմիական հարձակումների պատճառով:
Պատժամիջոցների էությունն այն է, որ նշված անձանց կարգելվի այցելել ԵՄ, իսկ այդ անձանց և կազմակերպության ֆինանսական ակտիվները կսառեցվեն: Բացի դրանից՝ ԵՄ-ում գտնվող ֆիզիկական և իրավաբանական անձանց կարգելվի միջոցներ հատկացնել պատժամիջոցների ցանկում հայտնված անձանց կամ կազմակերպություններին:
Հաղորդվում է, որ թիրախային պատժամիջոցների ենթարկված անձանց անունները կհրապարակվեն այսօր ավելի ուշ:
ՌԴ նախագահի խոսնակ Դմիտրի Պեսկովը, անդրադառնալով պատժամիջոցներին, նշել է, որ Մոսկվան բացասական է վերաբերվում այդ որոշմանը, քանի որ նշված մեղադրանքները ապացույց չունեն: