Ադրբեջանի սահմանապահ ծառայության ղեկավարը Հայաստանի հետ սահմանին ֆոտոսեսիա է արել
Ադրբեջանի Պետական սահմանային ծառայության ղեկավար Էլչին Գուլիեւը այցելել է Հայաստանի սահմանին ծառայողական եւ մարտական գործողություններ իրականացնող «Ղազախ» սահմանային ջոկատի սահմանային մարտական կետերը եւ հանդիպել զինծառայողների հետ:
Haqqin.az-ը հաղորդում է, որ ծառայության ղեկավարը ծանոթացել է «Ղազախ» սահմանային ջոկատի ծառայողական տարածքի օպերատիվ իրավիճակին, լսել է տարածքի պահպանության եւ սահմանի պաշտպանության ուժեղացման աշխատանքի մասին զեկույցներ:
«Գեներալ-գնդապետ Էլչին Գուլիեւը բացի Ղազախ եւ Աղստեւ շրջաններում պաշտպանության համակարգի կատարելագործումից, ստուգել է ժամանակակից սահմանային ենթակառուցվածքների ստեղծումը, նորակառույց ծառայողական շենքերի, սահմանային կետերի եւ սահմանային պարետատներում զորանոցների վիճակը, ծանոթացել է սահմանային կետերում տեղակայված մոդուլային տիպի շենքերի, դաշտային խոհանոցների եւ լոգարանների պայմանների հետ, ստուգել է դեպի սահմանապահ մարտական կետեր նոր ճանապարհների տեղադրման աշխատանքների ընթացքը եւ գազային եւ էլեկտրական հաղորդակցությունների տեղադրումը», - հաղորդում է հրատարակությունը:
Այնուհետ Գուլիեււը պարգեւատրել է զինծառայողներին, ճաշել անձնակազմի հետ, շնորհավորել զինծառայողների գալիք Ամանորը եւ Աշխարհի ադրբեջանցիների համերաշխության տոնը: