Ինչի՞ վրա է Nissan-ի ձերբակալված ղեկավարը ծախսել ուրիշի փողերը
Կառլոս Գոնը հարկայինից «անօրինական» 5 միլիարդ իեն է թաքցրել:
Ճապոնիայում, նոյեմբերի 19-ին, խարդախության կասկածանքով ձերբակալված Nissan, Renault և Mitsubishi ավտոկոնցեռնների ղեկավար Կառլոս Գոնը Nissan-ի փողերն օգտագործել է արտերկրում էլիտային բնակարանի ձեռքբերման համար, հաղորդում է Nikkei Asian Review-ը:
Նշվում է, որ Գոնը 2010թ. Նիդերլանդներում վենչուրային ընկերություն է հիմնել, իբրև թե արտերկրում ներդրումներ իրականացնելու նպատակով: Ընկերության 6 միլիարդ իեն կապիտալն ամբողջությամբ տրամադրել է Nissan-ը:
Սակայն ընկերությունը ներդրումային գործունեությամբ չի զբաղվել, փոխարենը՝ շքեղ կացարաններ է գնել Ռիո դե Ժանեյրոյում և Բեյրութում: Նշվում է, որ Գոնն անփոխհատույց օգտվել է անշարժ գույքից: Ռիո դե Ժանեյրոյի և Բեյրութի հետ կապված է Գոնի մանկությունը, իսկ ահա Nissan-ը որևէ խոշոր գործարք կամ գործընկեր Բեյրութում չունի:
Պարբերականի տվյալներով, բնակարանի գնման, սպասարկման և արդիականացման վրա ծախսվել է 2 միլիարդ իեն, միևնույն ժամանակ Գոնը ընկերության հաշվին օգտվել է բնակարաններից՝ Փարիզում և Ամստերդամում:
Գոնը մեղադրվում է ֆինանսական օրենսդրության խախտման մեջ: Նա տարիներ շարունակ ընկերության դրամական մուտքերը պակաս է ցույց տվել և ծախսել սեփական կարիքների համար: