Բլոգեր Իլյա Վառլամովին թույլ չեն տվել մտնել Ադրբեջան՝ 2016թ․ իշխանություններին քննադատելու համար
Բլոգեր եւ լուսանկարիչ Իլյա Վառլամովին թույլ չեն տվել մտնել Ադրբեջանի տարածք՝ հայտարարելով, որ նրա ներկայությունը երկրում ցանկալի չէ։ Այս մասին РБК-ին պատմել է ինքը՝ Վառլամովը
«Չբացատրեցին, ուղղակի ասացին, որ իմ ներկայությունը Ադրբեջանում ցանկալի չէ։ Ինձ տարան վտարման սրահ, ես դեպի Ստամբուլ չվերթի տոմս գնեցի, ինձ ուղեկցեցին եւ նստեցրեցին ինքնաթիռ, հիմա սպասում եմ թռիչքին»,- ասել է նա։
Վառլամովը նշել է, որ ինքը Լեռնային Ղարաբաղում չի եղել եւ մինչ այս հանգիստ Բաքու է այցելել։ «Վերջին անգամ Բաքվում եղել եմ 2016թ․ եւ քննադատական գրառումներ եմ կատարել»,- հավելել է բլոգերը։
Հոկտեմբերին արգելել են նաեւ Պետդումայի միջազգային հարաբերությունների հանձնաժողովի փոխնախագահ Սվետլանա Ժուրովայի, գրող Լյուդմիլա Ուլիցկայայի եւ «Հավատ» բարեգործական հիմնադրամի հոգաբարձու Նյուտա Ֆեդերմեսերի մուտքը Ադրբեջանի տարածք։ Նրանք Լեռնային Ղարաբաղ այցելելու համար հայտնվել են «սեւ ցուցակում»։