Տղերք, այս խելքով Ղարաբաղի հարցից կիլոմետրերով հեռու մնացեք. Աշոտյանը՝ վարչապետի թիմին
ՀՀԿ փոխնախագահ Արմեն Աշոտյանն անդրադարձել է համացանցում հայտնված տեսանյութին, որտեղ, իբրեւ թե, ՀՀ երրորդ նախագահ Սերժ Սարգսյանը խոսել է հող հանձնելուց։
Այս առնչությամբ, նա Facebook-ի իր էջում գրել է.
«Թավշիստների ագիտպրոպը երեկվանից մոնտաժել եւ ինտենսիվ տարածում է նախագահ Սերժ Սարգսյանի հարցազրույցից մի հատված, որտեղ մեզ փորձում է վերագրել «հող հանձնելու» թեման:
Ակնհայտ են դրդապատճառները: Երեկվա հարց ու պատասխանից հետո անգամ, երբ ես վարչապետին առերեսեցի իր օգոստոսյան գնահատականների հետ եւ նա կրկին հմտորեն խուսափեց պատասխանից, պետք էր մի քարոզչական հնարք, որով սվաղվեր Նիկոլ Փաշինյանի երեկվա մանիպուլյացիաները:
Հիշեցնեմ, որ վարչապետը օգոստոսի 17-ի հանրահավաքում ասաց, որ «դուք ՄԻԱՅՆ հող հանձնելու մասին եք բանակցել»:
Եվ ահա, կտրելով Կիսիլյովին տրված հարցազրույցից իրենց ուզած կտորը, այդ վայ-պոլիտտեխնոլոգները շարունակում են մակարոնեղեն կախել իրենց դեռ հավատացող միամիտ մարդկանց ականջներին:
Չէ, տղերք, այս խելքով լավ կլինի դուք վարչապետի PR-ով չզբաղվեք, իսկ Ղարաբաղի հարցից կիլոմետրերով հեռու մնացեք»։