«Նա հրեշ էր». Հորը դաժանորեն դանակահարած Խաչատուրյան քույրերի ընկերուհին նոր մանրամասներ է պատմել (լուսանկարներ)
Ռուսաստանի Դաշնության քննչական կոմիտեն դիմել է դատարան՝ պահանջելով կալանավորել երեք քույրերին՝ Քրիստինա, Մարինա, Անգելինա Խաչատուրյաններին, որոնք դաժանորեն սպանել են իրենց հորը՝ 57-ամյա Միխայիլ Խաչատուրյանին:
Ինչպես նշում է life.ru-ն, սպանության գործով հարուցվել է քրեական գործ:
Հայտնի է, որ սպանությունը տեղի է ունեցել հուլիսի 27-ին՝ Մոսկվայում: Տասնյոթ, 18, 19 տարեկան հարազատ քույրերը, այլևս չդիմանալով հոր՝ իրենց նկատմամբ դաժան ու կոպիտ վերաբերմունքին, դանակով բազմաթիվ հարվածներ են հասցրել նրան: Ձերբակալությունից հետո քույրերը խոստովանել են, որ հայրը տարիներ շարունակ տանջել է իրենց, ստորացրել ու սեռական բնույթի գործողությունների դրդել:
Մինչդեռ msk.kp.ru կայքը զրուցել է քաջատեղյակ աղբյուրի հետ, որը ճանաչել է Խաչատուրյանին ու նրա դուստրերին:
«Այն, ինչ կատարվել է, անհնար է մեկնաբանել, բայց իմ համոզմամբ՝ ողբերգությունից խուսափելն անհնար էր: Երեք քույրերն էլ վաղուց էին իրենց ներսում վրեժ կուտակել: Երկար էին համբերել, դիմացել, և ահա եկավ այն պահը, երբ կամ նա՝ նրանց, կամ նրանք՝ նրան»,-նշել է աղբյուրը:
Նա նկատել է, որ Խաչատուրյանների ընտանիքը լավ չճանաչողներին թվում էր, թե նրանց մոտ ամեն ինչ կարգին է: Հայրն ունի թանկարժեք մեքենա, մեծ բնակարան, դուստրերը գեղեցիկ են ու մոդելների նման: Մի խոսքով՝ ամեն ինչ լավ է:
«Սակայն աղջիկների համար փակ թեմա էր իրենց հոր գործունեության բնույթը: Նրանք գեթ մի բառ այդ մասին չէին ասում: Ես գլխի էի ընկնում, որ դա հանցավորության հետ կապ ուներ, ու հարցեր չէի տալիս: Ես նրանց հյուր էի գնում միայն այն ժամանակ, երբ Միխայիլը տանը չէր լինում: Նա տան դռան մոտ տեսախցիկ էր տեղադրել, որ վերահսկեր մարդկանց ելումուտը, ինչպես նաև դուստրերի ամեն քայլը»,-մանրամասնել է աղբյուրը՝ հավելելով, որ տղամարդը, հավանաբար, առնչություն է ունեցել թմրանյութերի տարածման հետ:
«Հոր կողմից սեռական բնույթի գործողությունների մասին նրանք երբեք չեն պատմել, և հասկանալի է՝ ինչու: Իսկ ծեծի մասին միշտ պատմել են: Հիշում եմ՝ մի անգամ հանդիպեցի Մարիային. նա ամբողջովին կապտուկներով էր պատված: Պատմեց, որ հայրն է իրեն զենքով ծեծել: Ես զարմանում էի, թե ինչու նրանք այդ հրեշին չեն կարողանում սանձել: Իսկ քույրերն ասում էին, որ բարեկամների շրջանում նա թիվ մեկ հեղինակությունն է. ոչ ոք չէր հանդգնի նրան հանդիմանել»,-պատմել է աղբյուրը:
Նա նաև նշել է, որ եթե աղջիկները փորձեին ոստիկանություն դիմել, հայրը նրանց կոչնչացներ:
Ավելի վաղ msk.kp.ru-ն հայտնել էր, որ Խաչատուրյանն իր մոսկովյան բնակարանում ապրել է դուստրերի հետ: Նրա կինը վաղուց հեռացել էր բնակարանից ու երեխաներին տեսնելու հնարավորությունից զրկվել: Պարզվել է, որ նա նաև 20-ամյա որդի ունի, սակայն տղան հոր հետ անհաշտ լինելու պատճառով տեղափոխվել է ու վարձով է բնակվում: