Եղվարդի բնակիչները բողոքում են «Արմօյլ» ընկերության նավթավերամշակման գործարանի կառուցման դեմ. ճանապարհը փակ է
Եղվարդի Նատի թաղամասի բնակիչները բողոքում են «Արմօյլ» ընկերության նավթավերամշակման գործարանի կառուցման դեմ: Բնակիչները փակել են գործարանին հարող ճանապարհն ու պահանջում են դադարեցնել գործարանի շինարարությունը:
««Արմօյլ» հեռացիր», «Կանգնեցնել աղետը» վանկարկումներով բնակիչները շարունակում են բողոքիր ակցիան: Համայնքապետարանի աշխատակիցը հորդորեց ճանապարհը միակողմանի բացեն, սակայն բնակիչները չհամաձայնեցին՝ ասելով, որ բազմաթիվ անգամ բարձրացրել են իրենց առողջությանը վերաբերող խնդիրը, սակայն ապարդյուն, այդ պատճառով որոշել են այսօր փակել ճանապարհը:
«Մենք հրավիրում ենք Բնապահպանության նախարարության ուշադրությունը, սպասում ենք ներկայացուցչին և պահանջում ենք, որ մեր հարցը լուծվի»,- ասաց ցուցարարներից մեկը:
Ոստիկանության ծառայողի հորդորներին, թե չի կարելի փակել ճանապարհը, այդ կերպ խախտվում է հասարակական կարգը, բնակիչները հակադարձեցին.«Դուք եկել եք մեզ օգնելո՞ւ, թե՞ ոչ»:
Բնակիչները շարունակում են փակ պահել Եղվարդի ճանապարհը և սպասում են Բնապահպանության նախարարության ու ՏԻՄ ներկայացուցչին: