Պեսկով․ «Ռուսաստանն անարձագանք չի թողնի Լեհաստանում ամերիկյան զինվորականների հնարավոր տեղակայումը»
Այս թեմայով
- Լեհաստանը 5 մլրդ դոլարի Patriot հակահրթիռային պաշտպանության համակարգեր կգնի ԱՄՆ-ից
- Լեհաստանում Ռուսաստանի օգտին լրտեսության մեջ կասկածվող պաշտոնյա է ձերբակալվել
- Լեհաստանի նախագահը միացել է ԱԱ–2018–ի բոյկոտին
- Լեհաստանը Երկրորդ համաշխարհայի ժամանակ Գերմանիայի գործողություններից ստացած վնասը գնահատել է 850 միլիարդ դոլար
Ռուսաստանը պատրաստ է արձագանքել դեպի իր սահմաններ հյուսիսատլանտյան դաշինքի ենթակառույցների ցանկացած ընդլայնմանը: Այսօր այս մասին լրագրողների հետ զրույցում նշել է Ռուսաստանի նախագահի մամուլի խոսնակ Դմիտրի Պեսկովը` արձագանքելով լեհական մամուլի վերջին տեղեկություններին:
Դրանց համաձայն, Վարշավան հանդես է եկել պաշտոնական նախաձեռնությամբ` ԱՄՆ-ին առաջարկելով Լեհաստանի տարածքում մշտական հիմունքներով ամերիկյան զրահատանկային դիվիզիա տեղակայել: «Երբ մենք տեսնում ենք, որ ՆԱՏՕ-ի ենթակառույցները քայլ առ քայլ մոտենում են մեր սահմաններին, պարզ է դառնում, որ այդ ամենը չի նպաստում [եվրոպական] աշխարհամասում անվտանգության և կայունության հաստատմանը»,- ասել է Պեսկովը:
Լեհաստանի պաշտպանության նախարարության մասնագետների կողմից մշակված փաստաթղթի համաձայն՝ Վարշավան պատրաստ է ամերիկացի զինվորականների տեղակայման նպատակով 2 միլիարդ դոլար տրամադրել: Այդ քայլի նպատակը, ըստ լեհ զինվորականների, «Ռուսաստանի ագրեսիվ նկրտումները զսպելն է»: