Կաթնամթերքի շուկայի խախտումները սկսվում են կաթի մթերման փուլում
Կաթնամթերքի շուկայում հայտնաբերված խախտումները սկսվում են հենց սկզբնական ժամանակահատվածում, այսինքն՝ մթերման ժամանակ: Այսօր լրագրողների հետ զրույցում նման տեսակետ հայտնեց «Սպառողների խորհրդատվության կենտրոն» ՀԿ նախագահ Կարեն Չիլինգարյանը՝ նկատելով, որ ՀՀ-ում կենդանիներ պահողները հիմնականում գյուղացիներն են: Նրա խոսքով՝ յուրաքանչյուր գյուղացի կարող է 3-5 կով ունենալ, իսկ խոշոր ֆերմերները ՀՀ-ում բավականին քիչ են:
«Աշխարհում կաթնամթերքը հիմնականում արտադրվում է խոշոր ֆերմերների մոտ, իսկ մեզ մոտ հիմնականում գյուղացիներն են արտադրում: Այս պայմաններում, եթե կաթ ենք մթերում, ապա կարելի ասել, որ ռիսկերը մեծ են: Եթե մի գյուղացու տված արտադրանքում խախտում եղավ, ապա այն կարող է տարածվել ամբողջ արտադրանքի վրա, քանի որ կաթը մեկ ընդհանուր տարայի մեջ է ի վերջո լցվում»,- ասաց նա:
Չիլինգարյանն այս պահին խնդրի լուծումը չի տեսնում և կարծում է, որ այն կկարգավորվի այն ժամանակ, երբ անասունների անձնագրավորում կլինի: Նա չի հավատում այն հայտարարություններին, թե այս պայմաններում կարելի է ամբողջությամբ վերացնել խնդիրը, կարելի է զուտ նվազեցնել:
Պանրագործների միության նախագահ Արմեն Գրիգորյանն էլ կարևորեց այն հանգամանքը, որ խնդիրի մասին բարձրաձայնվում է։ Նա համաձայնեց գործընկերոջ հետ և ինքն էլ հայտարարեց, որ ՀՀ-ում լուրջ խնդիրներ կան կաթի արտադրման հետ կապված:
«Կա խնդիր, որը կապված է կաթի արտադրման հետ, կա խնդիր, որը կապված է կաթի մատակարարման հետ: Կաթի արտադրություն մասով ասեմ, որ արդեն ավելի քան 5 տարի է՝ այս խնդիրը բարձրացնում եմ, բայց, ցավոք սրտի, անիվը տեղից չի շարժվում: ՀՀ-ում կաթի արտարդրության վրա իսկապես լուրջ ուշադրություն պետք է դարձվի, քանի որ այն բացթողումները, խնդիրները, որոնք նկատվում են վերամշակվողների մոտ, միշտ էլ լինելու են: Ինչպե՞ս կարող է վերամշակողը խնդիր չունենալ, եթե հիմնական հումքն ունի բարձր աղտոտվածության աստիճան»,- նշեց Արմեն Գրիգորյանը:
Վերջինս գտնում է, որ առաջնային պահանջարկ ունեցող սննդամթերքների հետ կապված կանոնակարգ պետք է լինի, այսինքն՝ պետք է հստակեցվի, թե ինչ ճանապարհով պետք է գնալ ու ինչ արդյունք պետք է ունենալ. «Ցավոք, մեր դեպքում սա մենք չունենք: Այնպես չէ, որ համապատասխան պետական պաշտոնյաները սրա մասին չեն մտածում, կամ էլ չգիտեն խնդրի մասին, բայց չեմ հասկանում, թե ինչ պատճառներով այս գործն առաջ չի գնում: Լավ կլիներ, որ այս մասին ոչ միայն խոսվեր, սխալները նկատվեին ու բարձրաձայնվեր, այլև աշխատանք տարվեր»,-շարունակեց Գրիգորյանը:
Պանրագործների միության նախագահը նշեց, որ քանի դեռ հումքում խնդիր կա, խնդիրներ շարունակելու են լիներ թե՛ պանրի ոլորտում, թե՛ կաթնաթթվային արտադրանքի վերամշակման ոլորտում:
«Պանրի պարագայում այս վտանգն ավելի նվազ է, քան մյուս կաթնամթերքներինը, քանի որ պանիրը հասունացման էտապ է անցնում, տեխնոլոգիական ցիկլն առանձնանում է: Այս պատճառով մյուս կաթնամթերքների համեմատ խնդիրները քիչ են: Իսկ կաթի մեջ կարող են ավելի վտանգավոր մանրէներ լինել, բայց, փառք Աստծո, այդ խնդիրներին չենք բախվել: Սա գալիս է ոչ թե բախտից, այլ վերամշակողներն են լավ աշխատել»,- ընդգծեց Գրիգորյանը:
Սակայն Կարեն Չիլինգարյանի կարծում է, որ խնդիրներ կան նաև վերահսկողության հետ կապված, ըստ նրա՝ պատշաճ մակարդակի չի արվում: Իսկ Գրիգորյանը համոզված է, որ վերահսկողությունը լուրջ դեր չի խաղում, քանի որ վերահսկողը որևէ բան չի կարող անել, ավելին ՝այսօր վերահսկողներն ավելի խելացի են մոտենում, այսինքն՝ արտադրողին բացատրում են խնդիրները, որոնք պետք է կարգավորվեն: