Կանադայում հանդիպել են Թիլերսոնն ու Չավուշօղլուն
Կանադայի Վանկուվեր քաղաքում հանդիպում են ունեցել ԱՄՆ պետքարտուղար Ռեքս Թիլերսոնն ու Թուրքիայի արտգործնախարար Մևլութ Չավուշօղլուն, այս մասին տեղեկացնում է թուրքական «Անադոլու» գործակալությունը:
Հայտնի է, որ հանդիպման հիմնական թեման է եղել Սիրիայի հյուսիսում ԱՄՆ-ի գլխավորած միջազգային կոալիցիայի և քրդական ազգային զինված ջոկատների (PYD/YPG) համագործակցությունը:
Հիշեցնենք, որ նախօրեին Չավուշօղլուն հայտարարել էր, որ եթե ԱՄՆ-ն շարունակի աջակցել Սիրիայի հյուսիսում կռվող քուրդ զինյալներին՝ տարածաշրջանում քաոս կսկսվի:
Անդրադառնալով միջազգային կոալիցիայի կողմից ավելի քան 30.000 քուրդ զինյալների մասնակցությամբ «Սիրիայի սահմանային անվտանգության ուժեր» ռազմական ուժի ստեղծման պլաններին՝ Չավուշօղլուն հայտարարել էր, որ ԱՄՆ-ն չի կարող միայնակ որոշումներ կայացնել միջազգային կոալիցիայի անունից, և այս քայլը կարող է լուրջ ազդեցություն ունենալ թուրք-ամերիկյան հարաբերությունների վրա:
Թիլերսոնի և Չավուշօղլուի հանդիպումը դռնփակ է եղել՝ առանց լրատվամիջոցների ներկայացուցիչների: Հանդիպման մանրամասներն առայժմ չեն հրապարակվում: