Հերթը արդեն Վլադիմիր Գասպարյանինն է
Ոմն Սաքուլիկի սարսափազդու արարքը, որի հետեւանքով երկու ոստիկան զոհվեց, կարծես թե, ցնցել է հասարակությանը կամ գոնե նրա առողջ մի մասին:
Հասարակությունը փորձում է հասկանալ, թե ինչու էին ազատության մեջ մինչ այժմ բազմաթիվ հանցանքներ կատարած եղբայրները, այդ թվում եւ Սաքուլիկը, որի մեղքով դեռ անցած տարվա մարտի տվյալներով առնվազն 27 հոգի մարմնական տարբեր աստիճանի վնասվածքներ են ստացել:
Նույն հասարակությանը հետաքրքրում է, թե ինչպես կարող են ոմանք այնքան արտոնյալ լինել, որ իրենց ավտոմքենայում կարող են մոտ մեկ տասնյակ ավտոհամարիշներ պահել եւ անպատիժ պտտվեն քաղաքում, այն էլ մեծ արագությամբ:
Հասարակությունն իրավապահ մարմիններից բացատրություն է պահանջում: Հայաստանի փոխոստիկանապետ Հունան Պողոսյանը ճիշտ է, վստահեցնում է, թե ոստիկանությունը մշտապես պատասխանատվության է ենթարկել խախտումներ կատարած անձանց եւ հետեւաբար ոստիկանությանը չպետք է որեւէ բանում մեղադրել, այսուհանդերձ, մինչեւ վերջ անկեղծ լինենք, մարդկանց քիչ է հետաքրքրում, թե որ համակարգը նրանց բռնեց, եւ որը բաց թողեց:
«Հասարակությունում վխտող բոլոր ճիճուներին, ոջիլներին միշտ պատժել է ոստիկանությունը եւ շարունակում է պատժել ու շարունակելու է»,- շեշտել է Հունան Պողոսյանը։ Այսուհանդերձ, հասարակությունը, կարծում ենք, որ նաեւ ոստիկանական համակարգն է սպասում ոստիկանապետ Վլադիմիր Գասպարյանի ուղերձին:
Նա չպետք է հապաղի: Հունան Պողոսյանը ոչ միայն այսօր, այլ նաեւ ամենապատասխանատու եւ բարդ պահերին իր վրա պատասխանատվություն է վերցրել եւ մեկնաբանել իրավիճակը, տվել գնահատականներ, բայց հիմա անհրաժեշտ է նաեւ Վլադիմիր Գասպարյանի խոսքը:
Հասարակությունը, ոստիկանները սպասում են, թե նա ինչ է ասելու: Սպասում են, քանի որ առանց հստակ եւ դիպուկ գնահատականի համակարգի աշխատանքը կարող է կաթվածահար լինել: Առողջ իրավապահները պետք է հասկանան, որ իրենք կարող են եւ պետք է արմատախիլ անեն սաքուլիկներին:
Եւ վերջապես հասարակությունը ուզում է իմանալ, թե ովքեր են այն իրավապահները, ում մեղքով սաքուլիկները մնացել են ազատության մեջ: Հասարակությունը ցանկանում է իմանալ, թե այդ ովքեր են նրանց հովանավորները, որ նրանք այդքան անարգել թքել են նույն հասարակության երեսին:
Ամենակարեւորը, հասարակությունը սպասում է, որ վերջապես սաքուլիկները հասկանան, որ մենք պետություն ունենք, որը չի հանդուրժելու Հունան Պողոսյանի ասած ոջիլների եւ ճիճուների ցինիկությունն ու լպիրշությունը: Հասարակությունը, այդ թվում եւ ոստիկանները, սպասում են Վլադիմիր Գասպարյանի գնահատականներին եւ մեկնաբանություններին:
Հակոբ Ասատրյան