Էրդողանը հրապարակայնորեն ծաղրել է քրդերի՝ թուրքերեն առոգանությունը
Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան երբեք թույլ չի տա քրդական պետության ստեղծումը Սիրիայի հյուսիսում, որը սպառնալիք կհանդիսանա Թուրքիայի սահմաններին:
Ինչպես գրում է թուրքական t24.com.tr կայքը, Էրդողանը շեշտել է, որ Թուրքիան շարունակելու է պայքարել քրդական զինված ջոատների դեմ թե՛ Իրաքում, թե՛ Սիրիայում և թե՛ Թուրքիայում:
Խոսելով «Քուրդիստանի աշխատավորական կուսակցություն» խմբավորման մասին, Թուրքիայի նախագահը նաև նշել է, որ նրանք արել են հնարավոր ամեն բան Թուրքիայի զարգացումը կանգնեցնելու և բարեփոխումները խոչընդոտելու համար: Ըստ Էրդողանի՝ Թուրքիային հավատարիմ մնացած քուրդ քաղաքացիների համար վիրավորական է Քուրդիստան պետության ստեղծման մասին խոսակցությունները, որոնք ընկած են ՔԱԿ խմբավորման գաղափարախոսության հիմքում:
«Ոմանք անընդհատ խոսում են ինչ-որ անկախ քրդական պետության մասին: Սա իմ քուրդ քաղաքացիների հանդեպ վիրավորանք է: Այս ձախակողմյան ուժերը երբեք էլ հայրենասեր չեն եղել: Օդանավակայան էինք կառուցում, կանգնում ասում էին՝ չենք ուզում, չենք ուզում», - ասել է Էրդողանը՝ «չենք ուզում» բառն արտասանելի ծաղրելով քրդերի՝ թուրքերեն առոգանությունը (գրական թուրքերենով «իսթեմեյիզ» բառի փոխարեն կիրառելով քրդական առոգանությամբ «իսմեզյուք» բառը):