Թուրքիայի ընդդիմությունը մեղադրում է Էրդողանին զրպարտիչ լինելու համար
Թուրքիայի ընդդիմադիր Ժողովրդահանրապետական կուսակցության խորհրդարանական խմբակցության ղեկավար Օզգյուր Օզելը մեղադրել է նախագահ Ռեջեփ Թայիփ Էրդողանին զրպարտության համար:
Ինչպես գրում է թուրքական «Բիրգյուն» պարբերականը, Օզելը հայտարարել է, որ եթե Էրդողանը բացատրություն չտա իրենց կուսակցության ղեկավար Քեմալ Քըլըչդարօղլուի դեմ մեղադրանքների համար և համապատասխան ապացույցներ չներկայացնի՝ ստիպված կլինի պատասխան տալ դրա համար:
«Եթե չապացուցես՝ ստախոս ես, զրպարտիչ ես», - ասել է Օզելը:
Նշենք, որ օրեր առաջ Էրդողանը մեղադրել էր ընդդիմության առաջնորդ Քըլըչդարօղլուին ահաբեկիչների հետ կապեր ունենալու համար:
Խոսելով ժողովրդահանրապետական պատգամավոր, կալանավորված Էսին Բերբերօղլուի մասին, ով մեղադրվում է ահաբեկիչների հետ կապերի համար՝ Էրդողանն ասել էր. «Եթե Քըլըչդարօղլուն այդ բանտում գտնվողի հետ էլ կապ ունենա՝ չզարմանաք»:
«Դու որտեղի՞ց գիտես: Բանտ լրտեսնե՞ր ես ուղարկում», - ի պատասխան ասել է խմբակցության ղեկավար Օզելը: