Ոնց ուզում սահմանազատում են անում
Ի՞նչ է կատարվում Սյունիքում, Վայոց ձորում եւ Գեղարքունիքում: Իսկ այնտեղ ծածուկ սահմանազատում եւ սահմանագծում է տեղի ունենում: Այնտեղ մենք ռազմաճակատի գիծ, կահավորված, կառուցված, ամրացված ռազմաճակատի գիծ չունենք, ինչը հեշտացնում է գաղտնի գործարքի կայացումը:
Իհարկե, ոմանք կշտապեն եւ կասեն՝ ի՞նչ սահմանազատում, ի՞նչ սահմանագծում, ի՞նչ գաղտնի գործարք, բայց միայն Արմեն Գրիգորյանի հայտարարությունը մաքսակետի տեղադրման մասին եւ ԱԱԾ-ի հայտարարությունը Կապան-Ճակատեն ճանապարհին ադրբեջանական մաքսակետի տեղադրման մասին վկայում է բացառապես ծածուկ սահմանազատման եւ սահմանագծման մասին, այն էլ բացառապես ադրբեջանական սցենարի համաձայն:
Ի՞նչ գործ ունեն այդ մաքսակետերը Հայաստանի ճանապարհին, ի՞նչ քսան կիլոմետրանոց հատված: Ի՞նչ գործ ունի մաքսակետը Ճակատեն տանող ճանապարհին:
Վերցրեք թեկուզ 1987 թվականին Խորհրդային Միությունում տպագրված Խորհրդային Հայաստանի քարտեզը: Նայեք ուշադիր, շատ ուշադիր ու փորձեք այնտեղ գտնել, որ Գորիս-Կապան ճանապարհի քսան կիլոմետրոնոց հատվածն անցնում է Խորհրդային Ադրբեջանի տարածքով կամ Կապան-Ճակատեն ճանապարհն անցնում է Ադրչբեջանի տարածքով: Չկա նմ,ան բան:
Մենք գործ ունենք կամ վախկոտության, կամ դավաճանության կամ անմեղսոեւնակության հետ: Բոլոր դեպքերում էլ այս վարչախումբը րոպե առաջ պետք է հեռանա:
Իսկ եթե ինչ-որ մեկի մտքով անցնի սահմանների մասին դատողություն անել Գուգլի հավելվածներով, ապա արդեն իսկ հայտնի է, որ այդ քարտեզը, որ այնտեղ ընդգծված սահմանագիծը չի համապատասխանում խորհրդային տարիներին առկա սահմաններին: Այն տեղաշարժված է հօգուտ Ադրբեջանի:
Ինչպես երկու տարի առաջ ոնց ուզում բանակցում էին, հիմա էլ ոնց ուզում սահմանագծում են անում: Ի դեպ, եթե հանկարծ վարչախմբի ներկայացուցիչը հայտարարի, թե իրենք ծածուկ սահմանազատում եւ սահմանագծում չեն անում, պարզապես չեն կարողանում դիմակայել ադրբեջանական կողմի գործողություններին, ապա կրկին անգամ պետք է վայրկյան առաջ հրաժարական տան:
Top-News.am