«Կարմիր բլուր» գերեզմանոցի մոտ հնչել են կրակոցներ. կան վիրավորներ
Shamshyan.com–ի տեղեկություններով՝ այսօր՝ ապրիլի 9–ին, կրակոցներ են հնչել Երեւանում: Ժողովրդին հայտնի «Կարմիր բլուր» կոչվող գերեզմանոցի տարածքից Երեւանի տարբեր հիվանդանոցներ են տեղափոխվել մի քանի քաղաքացիներ:
Կայքի հաղորդմամբ, հիվանդանոց տեղափոխված քաղաքացիները հրազենային եւ սուր, կտրող–ծակող առարկայի հարվածից վնասվածքներ են ստացել։
Կրակոցները հնչել են «Կարմիր բլուր» գերեզմանոցի մոտ գործող սգո սրահներից մեկի դիմաց։
Shamshyan.com–ի հաղորդմամբ, վարկածներից մեկի համաձայն՝ այս կրակոցները կապ ունեն ամիսներ առաջ Երեւանի Մայիսի 9-ի փողոցում հրազենի գործադրմամբ տեղի ունեցած մեկ այլ սպանության հետ:
Դեպքի վայրի զննություն է կատարվել, հայտնաբերվել են մեծ թվով կրակված պարկուճներ, գնդակներ եւ արնանման հետքեր:
Ոստիկաններն ու քննիչները դեպքի վայրում հայտնաբերել են նաեւ Mercedes մակնիշի ավտոմեքենա, որի վրա առկա են կրակոցի հետքեր, վարորդի նստատեղի վրա հայտնաբերվել է կրակված գնդակ:
Կայքի տեղեկություններով՝ Mercedes–ի վարորդը ոչ մի կապ չունի նշված միջադեպի հետ, նա եկել է իր հարազատի հոգեհանգստի արարողությանը: