Եվրոպական դեղերի գործակալության խոսնակը հաստատել է AstraZeneca պատվաստանյութի և թրոմբոզի առաջացման միջև կապը
Եվրոպական դեղերի գործակալության մամուլի խոսնակը հաստատել է AstraZeneca հակակորոնավիրուսային պատվաստանյութի և արյան թրոմբի առաջացման միջև կապը:
Այս մասին հայտնում է France 24-ը:
Նշվում է՝ այս պատվաստանյութն օգտագործելուց հետո արյան թրոմբոզի դեպքեր են արձանագրվել տարբեր երկրներում: Օրինակ՝ ապրիլի 3-ին հայտնի է դարձել, որ այդ պատճառով վերջին օրերին Մեծ Բրիտանիայում 7 մարդ է մահացել:
Հիշեցնենք՝ ներկայում ԵՄ շուկայում թույլատրվում են Pfizer/BioNTech (գնվել է շուրջ 600 միլիոն դեղաչափ), Moderna (գնվել է 160 միլիոն դեղաչափ) և AstraZeneca (գնվել է մոտ 400 միլիոն դեղաչափ) ընկերությունների կողմից արտադրված պատվաստանյութերը: Բացի այդ, Եվրոպական հանձանաժողովը ԵՄ-ին պատվաստանյութեր մատակարարելու առնչությամբ պայմանագրեր է կնքել Johnson & Johnson, Sanofi-GSK, CureVac ընկերությունների հետ:
Ինչպես ավելի վաղ տեղեկացրել էր Tert.am-ը, որ Ավստրիայի իշխանությունները որոշում էին կայացրել կասեցնել AstraZeneca պատվաստանյութի խմբաքանակի օգտագործումը որպես նախազգուշական միջոց պատվաստում ստանալուց հետո մի կնոջ մահվան և մեկ այլ անձի մոտ թրոմբի զարգացման պատճառով:
Էստոնիան, Լիտվան, Լյուքսեմբուրգը և Լատվիան հետևել են Ավստրիայի օրինակին: Դեղամիջոցի օգտագործումը դադարեցրել են նաև Դանիան, Նորվեգիան, Իսլանդիան, Բուլղարիան, Ռումինիան և Կոնգոյի Դեմոկրատական Հանրապետությունը: