Լեռնային Ղարաբաղի հակամարտությունը ռազմական լուծում չունի․ Քերի Քավանո
ԵԱՀԿ Մինսկի խմբի 1999-2001 թվականներին ԱՄՆ նախկին համանախագահ Քերի Քավանոն «Ալ Ջազիրայի» համար գրել է «Լեռնային Ղարաբաղի հակամարտությունը ռազմական լուծում չունի» վերտառությամբ հոդված։
«Ներկայումս Հայաստանն ու Ադրբեջանը ռազմական գործողությունների կտրուկ էսկալացիայի սահմանին են, ինչը կհանգեցնի է՛լ ավելի մեծ մարդկային տառապանքի եւ օտարերկրյա տերությունների լուրջ ռազմական միջամտություն հրահրելու ռիսկի»,- նշել է նա։
Քվանոն շեշտել է, որ Ալիեւը Թուրքիայի աջակցությամբ անցել է ռազմական լուծման՝ դիմադրելով մարտական գործողությունները դադարեցնելու եւ բանակցային սեղանի շուրջ վերադառնալու կոչերին։
Նրա խոսքով՝ հենց բանակցությունները, այլ ոչ թե ռազմական գործողությունները, հնարավորություն կտան խոսել կայուն կարգավորման մասին:
«Հայերի եւ ադրբեջանցիների միջեւ բանակցությունների հիման վրա խաղաղության հասնելու համար պահանջվում է 3 տարբեր բաղադրիչ՝ փոխզիջումային որոշումների ուղղությամբ աշխատելու առաջնորդների պատրաստակամությունը, նման կարգավորման համար միջազգային օգնությունն ու դրա հետագա իրականացումը, ինչպես նաեւ նման փոխզիջմանը բնակչությանը պատրաստելը»,- ասել է նա՝ հավելելով, որ խաղաղության հասնելու համար պետք է իրական փոխզիջում:
«Լեռնային Ղարաբաղի շուրջ վեճը կարգավորելը հեշտ չէ: Հայ եւ ադրբեջանցի առաջնորդների կողմից պահանջվում է քաղաքական խիզախություն, որպեսզի վերջ դրվի մարտական գործողություններին, սկսվեն կառուցողական, փոխշահավետ բանակցությունները, եւ որ երկու ժողովուրդները վստահ լինեն, որ նման մոտեցումը կարող է ապահովել խաղաղությունը, որին նրանք արժանի են»,- նշել է նա: