Ադրբեջանի ղեկավարությունն այսօր հրահրում է պատերազմ
Պետք է փաստել, որ Ադրբեջանի նախագահը, արտգործնախարարը, նաև՝ Թուրքիայի նախագահն ու արտգործնախարարը շատ ակտիվ տեղեկատվական, նախապատրաստական աշխատանքներ են վարում այն ուղղությամբ, որ հնարավոր է՝ նոր ռազմական սադրանքների գնան: Այս մասին խորհրդարանական ճեպազրույցների ընթացքում հայտարարեց ԱԺ «Բարգավաճ Հայաստան» խմբակցության պատգամավոր Արման Աբովյանը՝ անդրադառնալով Ադրբեջանի կողմից հնչեցվող հայտարարություններին, թե ՀՀ-ն ձախողել է բանակցությունները:
«Այն հայտարարությունները, որոնք մենք լսում ենք վերջին օրերին, որ մի կողմից մտահոգիչ են, մյուս կողմից մեզ կարող են զավեշտալի թվալ, շատ հստակ մտնում են նախապատրաստական տրամաբանության մեջ»,-նշեց պատգամավորը:
Նա հիշեցրեց, որ օգոստոսին Ադրբեջանն ու Թուրքիան Նախիջևանում համատեղ լայնածավալ զորավարժություններ իրականացրին, այնտեղ տեղավորվեցին թուրքական զորքեր, մեծ քանակով զրահատեխնիկա, ապա ընդգծեց՝ մինչ օրս ոչ մի զինվոր և ոչ մի զինատեսակ այդ տարածքից դուրս չի հանվել:
Աբովյանի դիտարկմամբ՝ այս պահին ՀՀ-ն բոլոր հնարավոր և անհնարին միջազգային խողովակներով, հարթակներով պետք է բարձրաձայնի, որ Ադրբեջանն ու Թուրքիան փորձում են, մեղմ ասած, ռազմական լարվածություն գեներացնել տարածաշրջանում: «Պետք է նաև հստակ հասկանալ, որ այն իրադարձությունները, որոնք տեղի են ունենում ՀՀ-ի և Արցախի շուրջ, մեզ պետք է ստիպեն գործել թե՛ միջազգային ասպարեզում, թե՛ բանակցությունների սեղանի շուրջ դիվանագիտական առումով ավելի հետևողական և ագրեսիվ»,-ասաց նա՝ նշելով, թե անհասկանալի է՝ ինչի շուրջ են բանակցում բանակցողները, որովհետև ասել են՝ կոնսուլտացիա են անում.
«Բայց կարևոր է նշել մի բան՝ Ադրբեջանի ղեկավարի հայտարարությունը բնավ կապ չունի բանակցային պրոցեսի հետ: Ադրբեջանի ղեկավարությունն այսօր հրահրում է պատերազմ, և բացի հրահրելուց՝ տանում է շատ ակտիվ նախապատրաստական աշխատանքներ»,-ընդգծեց Արման Աբովյանը: