ՌԴ-ն հնարավոր ամեն ինչ կանի Հայաստանի եւ Ադրբեջանի միջեւ լարվածությունը նվազեցնելու համար
Ռուսաստանը կգործարկի բոլոր հնարավորությունները, որ կարգավորի Հայաստանի եւ Ադրբեջանի միջեւ ներկայիս սրացումը: Այս մասին այսօր ՏԱՍՍ-ի հետ զրույցում ասել է Ռուսաստանի ԱԳ փոխնախարար Անդրեյ Ռուդենկոն:
«Կարող եմ միայն հավաստիացնել, որ մենք կանենք հնարավոր ամեն ինչ եւ կդրսեւորենք ռուսական դիվանագիտության, ժողովրդական դիվանագիտության բոլոր լավագույն որակները, որպեսզի ոչ միան [կարգավորենք] ներկայիս սահմանային կոնֆլիկտը, այլեւ՝ որ մեզ համար եղբայրական եւ մերձավոր երկրների՝ Հայաստանի եւ Ադրբեջանի հարաբերություններն ընդհանրապես բարելավվեն: Ռուսաստանն այդպիսի հնարավորություններ ունի, մենք քանի անգամ դրանից օգտվել ենք, այդ թվում՝ 2017 թվականին Լեռնային Ղարաբաղի շուրջ ռազմական գործողությունների վերջին բռնկման ժամանակ: Ես վստահ եմ, որ մեր բոլոր հնարավորությունները կգործարկվեն»,- ասել է նա: