«Բիլայն»-ի աշխատակիցները բողոքի ցույց են իրականացնում
Հանրային ծառայությունները կարգավորող հանձնաժողովն արտահերթ նիստ է հրավիրել՝քննարկելու ՎԵՈՆ Արմենիա» փակ բաժնետիրական կանոնադրական կապիտալը օտարելու թույլտվություն տալու մասին հարցը, ինչի դեմ բողոքում են «Բիլայն»-ի հարյուրավոր աշխատակիցներ։
Ոստիկանությունը միանգամից զգուշացրեց, որ Պարետի որոշմամբ ՝ արտակարգ դրությամբ պայմանավորված՝ արգելված է հավաքների իրականացնելը։
Հիշեցնենք, որ ՀՀ ՏՄՊՊՀ հուլիսի 9-ի նիստում որոշում է կայացվել թույլատրել «ՎԵՈՆ Արմենիա» փակ բաժնետիրական և «Թիմ» սահմանափակ պատասխանատվությամբ ընկերությունների համակենտրոնացումը` «Թիմ» սահմանափակ պատասխանատվությամբ ընկերության կողմից «ՎԵՈՆ Արմենիա» փակ բաժնետիրական ընկերության 100 տոկոս փայաբաժնի ձեռքբերման միջոցով: Այսօր հարցը քննարկվում է Հանրային ծառայությունները կարգավորող հանձնաժողովում։
Օրեր առաջ՝ «Beeline» ընկերության 300 աշխատակիցներ գրավոր դիմել են ՀՀ վարչապետ Նիկոլ Փաշինյանին և տեղեկացրել, որ դեմ են, որպեսզի «Beeline»-ը վաճառվի Հայկ և Ալեքսանդր Եսայանների «Թիմ» ընկերությանը։ Աշխատակիցները մտավախություն են հայտնել, որ «Beeline»-ը գնելուց հետո Եսայան եղբայրներն աշխատանքի կտեղավորեն «Յուքոմ»-ից հեռացած աշխատակիցներին, ինչի արդյունքում իրենք գործազուրկ կդառնան։