Փաշինյանի դեպքում, մենք անընդհատ գործ ունենք հուզական պրիապիզմի դրսեւորումների հետ․ ՍԴ նախագահի խորհրդական
Այդ անձի պոռթկումները դատական իշխանության առնչությամբ որեւէ կապ չունեն իրավագիտության հետ, վախենամ, որ նույնիսկ քաղաքականության հետ որեւէ աղերս չունեն, մենք անընդհատ գործ ունենք հուզական պրիապիզմի (սեռական գրգռվածության հետ առնչություն չունեցող երկարատեւ հիվանդագին էրեկցիա) դրսեւորումների հետ։ Այս մասին 168․am-ի՝ Սաթիկ Սեյրանյանի հեղինակային PRESSING հաղորդաշարի ընթացքում, պատասխանելով վարչապետ Նիկոլ Փաշինյանի ելույթների մասին հարցին՝ հայտարարել է ՍԴ նախագահի խորհրդական Գրիգոր Մուրադյանը։
«Երբ անզուսպ բառամթերքով, պաշտոնատար անձին, մարդուն, անհատին ոչ վայել բառամթերքով պիտակավորվում են անձինք, որոնք, ըստ էության, հնարավոր չէ, որ բացարձակ մեծամասնության մեջ կամ ամբողջովին կապ ունենան կոռուպցիայի հետ, եթե չկա դատավճիռ, ինչպես կարելի է այդպիսի որակումներ տալ։ Այդ, այսպես կոչված, հեղափոխությունից հետո մեկ դատավճիռ է եղել մեկ դատավորի վերաբերյալ։ Որեւէ այլ փաստ չկա։ Ամենահզոր փաստը գրիչն էր, Հրայր Թովմասյանի գրիչը։ Երկրորդը՝ եթե կոռուպցիոն ներազդեցության մասին է խոսքը, լիազորությունների չարաշահումը բազմակի դրվագներով ամենակեղտոտ կոռուպցիայի դրսեւորումն է, վարչական կոռուպցիայի դրսեւորումը։ Մենք տեսնում ենք այս իշխանության կողմից հենց այդպիսի դրսեւորումներ, համատարած, համապարփակ, համակարգված, մեկ կենտրոնից կառավարվող դրսեւորումներ։ Ամենափայլուն օրինակը ՍԴ «շուրջ» տեղի ունեցողն էր, բոլոր հնարավոր իրավական, ոչ իրավական, անբարոյական մեթոդներով, տեղեկատվական ահաբեկման միջոցով փորձում էին եւ արտոնյալ թոշակի միջոցով փորձում էին զավթել ՍԴ-ն։ Մեկ փակագիծ բացեմ․ ՍԴ ռազմավարությունն էր՝ ոչ մի դեպքում չընկրկել, եւ ամենակարեւորը, հարկադրել, որպեսզի այս իշխանությունները միայն հակաիրավական, հակասահմանադրական ու պետական հեղաշրջման միջոցով հասնեն իրենց նպատակին»։
Գրիգոր Մուրադյանն ասել է, որ մինչեւ այժմ ձեռնպահ է մնացել ՀՀ նախագահի գործունեության մասին խոսելուց, սակայն կա անդառնալիության սահման, որից այն կողմ այդ ինստիտուտն ապալեգիտիմացվում է, այնպես ինչպես կառավարությունը, ԱԺ-ն, իրավապահ համակարգը, շուտով նաեւ ՍԴ-ն։
«Այդ կարեւորագույն ինստիտուտը, թեեւ քաղաքական ներազդեցության լուրջ լծակներով չօժտված, ցավոք, չկայացավ։ Նա, ՍԴ չդիմելով, կարող է ասել, որ պարտականություն չունեմ, որը ԱԺ-ն ուներ, բայց շրջանցեց, բայց երբ մենք լսում ենք, որ Արարատ Միրզոյանը մատնում է նրան, օգտագործում օրենքի բացը, տեսնում ենք, որ նա չի օգտվում իր իրավունքից։ Այդ հայտնի ստորագրությամբ նա միանում է արդեն հայտնի հանցավոր արարքին», ասել է ՍԴ նախագահի խորհրդական Գրիգոր Մուրադյանը։