Իսրայելը Հայաստանին առաջարկել է սպառազինություն գնել, սակայն Երեւանը մերժել է
Ժամանակին Իսրայելը Հայաստանին առաջարկել է սպառազինություն գնել, սակայն Երեւանը մերժել է։ Այս մասին հունիսի 26-ին լրագրողների հետ հանդիպմանն ասել է Կնեսետի նախկին պատգամավոր Ալեքսանդր Ցինկերը։
Նրա խոսքով՝ Իսրայելն աշխարհում ռազմական սպառազինություն, տեխնիկա մատակարարող երկրների հնգյակում է։
«Մենք դա չենք թաքցնում։ Բաց աղբյուրների համաձայն՝ Իսրայելի ռազմական արդյունաբերությունը տարեկան վաստակում է շուրջ 5-6 մլրդ դոլար։ Ժամանակին Հայաստանին եւս առաջարկում էին գնել որոշ սպառազինություն։ Դրան ի պատասխան՝ Հայաստանի պաշտպանության նախկին նախարարն ասել է՝ այն թանկ է եւ մեզ ձեռնտու չէ։ Այդ պատճառով, ինչպես ասում են, գնդակը Հայաստանի կողմում է։ Խնդրեմ, մենք միշտ բաց ենք, եթե դուք որեւէ բան եք ցանկանում, հարցը միշտ կարող է քննարկվել»,- նշել է Ցինկերը։
Ինչ վերաբերում է Իսրայելի՝ Ադրբեջանին զենք մատակարարելուն, Կնեսետի նախկին պատգամավորն ասել է. «Կարծում եմ՝ Ձեր ռազմավարական գործընկերը՝ Ռուսաստանը, Ադրբեջանին ավելի շատ սպառազինություն է մատակարարում»։