Ինչ նպատակ է հետապնդում նախարարությունը շփոթեցնելով դիմորդներին
Դիմորդները հանձնել են նախավերջին միասնական քննությունը` Հայոց պատմություն եւ քիմիա առարկաներից:
Անդրադառնանք պատմության քննության թեստին, փորձելով հասկանալ, թե ինչ նպատակ են հետապնդում այն կազմողները, եւ թե ինչու է ՀՀ ԿԳ նախարարությունը խաղում դիմորդների առողջության հետ: Ո՞րն է նպատակը՝ շփոթեցնել դիմորդներին, թե՞ ստուգել նրանց գիտելիքները: Պարզվում է նախարարությունը, թեստի հեղինակները խնդիր են դնում շփոթեցնել դիմորդներին:
Բերենք մի քանի օրինակ եւ սպասենք նախարարության համապատասխան պարզաբանմանը:
Այսպես, թեստերից մեկում տրված է հետեւյալ հարցը.
Թվարկվածներից որո՞նք են օսմանյան Թուրքիայի համար 1723 թ. Անդրկովկաս
արշավելու պատճառ հանդիսացել.
1) լեզգիների արշավանքները Անդրկովկաս
2) հայ և վրաց ժողովուրդների չընդհատվող բանակցությունները Արեւմուտքի հետ
3) ռուսական ազդեցության ուժեղացումը Անդրկովկասում
4) աֆղանների կողմից Սպահանի գրավումը
5) հայ և վրաց ժողովուրդների ազատագրական շարժումների աշխուժացումը
Մինչ պատասխանին անցնելը նշենք, որ 11-րդ դասարանի «Հայոց պատմություն» դասագրքում գրված է.
«Պարսկական պետության թուլացումից փորձեց օգտվել նաեւ Օսմանյան կայսրությունը: Աֆղանների կողմից Սպահանի գրավումը եւ ռուսների Անդրկովկաս արշավելը եւս հարմար առիթ էին Պարսկաստանի վաղեմի թշնամի թուրքերի համար: Օսմանյան կայսրությունը նպատակ ուներ ճնշելու նաեւ հայ եւ վրաց ժողովուրդների ազատագրական շարժումները: Միաժամանակ նա ձգտում էր խոչընդոտելու տարածաշրջանում Ռուսաստանի ծավալմանը եւ անմիջապես ձեռնամուխ եղավ Այսրկովկասի ու Պարսկաստանի արեւմտյան նահանգների նվաճմանը»:
Դիմորդները նշված հինգ տարբերակներից պետք է ընտրեն երկուսը: Ուշադրություն դարձրեք՝ ընդամենը երկուսը: Դիմորդներից մեկը ընտրել է 3-րդ եւ 4-րդ տարբերակները: Թեստի հեղինակները դա համարել են սխալ, նշելով, որ ճիշտը 3-րդ եւ 5-րդ տարբերակներն են:
Հիմա հարց նախարարությանը, նախարարին՝ ծաղրո՞ւմ եք դիմորդներին, դիտավորյալ արհեստական դժվարություններ ստեղծո՞ւմ, թե փորձում քայքայել 17 տարեկան տղաների եւ աղջիկների առողջությունը: Ո՞վ է պատասխան տալու այս խայտառակության համար:
Իրականում ճիշտ են 3-րդ, 4-րդ եւ 5-րդ տարբերակները, բայց առաջարկվում է նշել միայն երկուսը: Այստեղից կոռուպցիայի հոտ է փչում: Առնվազն:
Ի դեպ, հենց թեստի հեղինակներն են կոպիտ սխալ թույլ տվել, սխալ նշելով Օսմանյան կայսրության անունը: Թեստում նշված է օսմանյան Թուրքիա, երբ նշված ժամանակահատվածում նման անունով երկիր գոյություն չի ունեցել: Բացի այդ, Անդրկովկաս եզրույթը օգտագործում են ռուսները, մենք վաղուց արդեն պետք է որ անցած լինեինք Հարավային Կովկաս եզրույթին: Այսպիսով, մեզ մնում է անբավարար նշանակել թեստի հեղինակներին:
Անցնենք մեկ այլ խայտառակության:
«Հայոց տունը» պետք է կազմվեր ժողովրդի կողմից նշանակված
փոխանորդներից:
Դիմորդը սա համարել է ճիշտ պնդում, իսկ թեստի հեղինակներն այն սխալ են համարել, քանի որ իբր ճիշտ պատասխանը հետեւյալն է՝ «Հայոց տունը» պետք է կազմվեր ժողովրդի կողմից ընտրված փոխանորդներից:
Անհեթեթ օրինակները շատ են:
Մենք սպասում ենք նախարարության, թեստի հեղինակների պարզաբանմանը:
Արմինե Մկրտչյան