Ով 100 հազար է ստանում, հինգ տարի հետո կստանա 125 հազար, իսկ ով մեկ միլիոն՝ մեկ միլիոն 250 հազար
ՀՀԿ ԳՄ հերթական նիստից հետո լրագրողների հետ հանդիպման ժամանակ կուսակցության մամլո խոսնակ Էդուարդ Շարմազանովը նշեց, որ քննարկվել է Կառավարության ծրագիրը, որն ըստ խոսնակի՝ իրատեսական է և հավակնոտ:
«Նախատեսում ենք տնտեսական աճ՝ տարեկան 5 տոկոս, նվազագույն աշխատավարձի աճ՝ 5-ամյա ծրագրով 25 տոկոս աճ, 12 տոկոսով գործազրկության նվազում: Մեծ ուշադրություն է դարձվել հակակոռուպցիոն պայքարին, ՀՀ անվտանգության խնդիրներին՝ շատ լուրջ ուշադրություն դարձնելով եւ խորացնելով ազգ- բանակ գաղափարածոսությունը»,- ասաց Շարմազանովը:
ԱԺ փոխնախագահի խոսքով, Կառավարության ծրագիրն արդեն հաջորդ շաբաթ կներկայացվի Ազգային ժողովին: Շարմազանովը նշեց, որ ծրագիրը ներկայացնելիս Կառավարության ղեկավարը հաշվետվություն նույնպես կներկայացնի կատարված աշխատանքների վերաբերյալ:
Իսկ որ ամենակարեւորն է, Շարմազանովը ոչ մի բառ չասաց այն մասին, թե հինգ տարի հետո որքան է արժեզրկվելու դրամը: