Արցախցի բռնցքամարտիկները ոսկե մեդալներ են նվաճել Սանկտ Պետերբուրգում
Սանկտ Պետերբուրգում ավարտվել է բռնցքամարտի աշխարհի չեմպիոն Նիկոլայ Վալուևի անվան միջազգային մրցաշարը, որին մասնակցել են նաև արցախցի մարզիկներ: Ընդհանուր առմամբ տարբեր երկրներից մրցաշարին մասնակցել է ավելի քան 250 մարզիկ:
Արցախը ներկայացրած չորս մարզիկներից երկուսը՝ Էրիկ Առստամյանը և Աշոտ Բեգլարյանը, գրավել են առաջին տեղերը: Ի դեպ, Էրիկը հանդես է եկել 40 կգ քաշային կարգում, չնայած նրան, որ կշռում է 38 կգ:
Արցախի բռնցքամարտի ֆեդերացիայի նախագահ Նարեկ Աբրահամյանը նշել է, որ պատանի հայ բռնցքամարտիկները կարողացել են այնտեղ ներկայանալ որպես Արցախի պատվիրակներ, սակայն ցավով նաև արձանագրել է, որ շատերը չգիտեն Արցախի Հանրապետության մասին: