Ինչո՞վ է զբաղված ՀՀ հպարտ վարչապետը կամ ինչպես է Հայաստանը պաշտպանում կորոնավիրուսից
Ծանոթացիր վարչապետի ֆեյսբուքյան էջին եւ կհասկանաս, թե ինչով է նա զբաղվում: Սա ժամանակակից հայկական ասացվածք է: Իսկ ծանոթանալ պետք է, հասկանալու համար, թե ինչպես են ղեկավարում պետությունը:
Պարզվում է Հայաստանում կորոնավիրուսի դեմ պայքարում են շամանական կամ սնոտիապաշտական եղանակներով:
«Թու, թու, թու՝ Հայաստանում մինչ այս պահը կորոնավիրուսով հիվանդացության ոչ մի դեպք չի գրանցվել։ Եւ եթե պահեք այս պաստառում նկարագրված բոլոր կանոնները՝ չի էլ գրանցվի:) Խնդրում եմ հնարավորինս շատ տարածել»,- գրել է կառավարության ղեկավարը, երկրի վարչապետը:
Չինացիները փաստորեն գլխի չէին ընկել նույն շամանական կամ սնոտիապաշտական հնարքներով կորոնավիրուսի դեմն առնել: Հիմա գուցե կփոխեն մարտավարությունն ու ռազմավարությունը:
Կարծում ենք, որ Նիկոլ Փաշինյանը կարող է արժանանալ նաեւ Նոբելյան մրցանակի: Իսկապես, իսկ ինչու՝ ոչ:
«Փաստ համար 50. Կառավարության որոշմամբ շուրջ 1.5 մլրդ. դրամ կտրամադրվի Ադրբեջանից բռնագաղթած 112 ընտանիքի բնակարանային խնդրի լուծման համար։ 10 տարի այս ուղղությամբ Կառավարությունը համարյա ոչինչ չէր արել»,- սա եւս Փաշինյանի ֆեյսբուքյան գրառումներից է։
Ինչ է սա, եթե ոչ պոպուլիզմ եւ ընտրակաշառք: Իսկապես, տարօրինակ է, որ ներգաղթից 30 տարի անց ինչ-որ մարդկանց գումար է հատկացվում բնակարանային խնդիրները լուծելու համար: Ովքե՞ր են նրանք, որ մինչ օրս առանձնատուն կամ բնակարան չեն ունեցել: Հետաքրքիր կլիներ, եթե հրապարակվեր նրանց ցուցակը, որոնք օգտվելու են այս գումարից: 3 միլիոն 130 հազար դոլարը, մեր մեջ ասած, քիչ գումար չէ: Գրեթե յուրաքանչյուր ընտանիքի բաժին է հասնելու 28 հազար դոլար, իսկ սահմանում բնակվում են երիտասարդ ընտանիքներ, որոնք տուն չունեն, իսկ նրանց աջակցելու մասին որեւէ մեկը չի մտածում:
Փաշինյանը նաեւ լուսանկարներ է տեղադրել իր էջում ու չես հասկանում հումոր է անում, կատակ, թե իսկապես կարծում է, որ ՀՀ քաղաքացին ապրում, սնվում եւ զարգանում է վիճակագրական կասկածելի թվերով:
Եւ ի՞նչ է շահելու ՀՀ հպարտ քաղաքացին, եթե մի ինչ-որ թղթի կտորի վրա լրացնի իր տվյալները, որտեղ նշված է «ՀՀ հպարտ քաղաքացի»:
Իսկապես, ՀՀ քաղաքացիներին հետաքրքրո՞ւմ է, թե ինչով է զբաղվում Նիկոլ Փաշինյանը, թե՞ անտարբերությունն այս աստիճան է խորացել:
Հետաքրքիր է նաեւ, որ Փաշինյանը, որը սիրում է իր ֆեյսբուքյան էջում կիսվել տարատեսակ գրառումներով, լուսանկարներով անտարբերության մատնեց Մայր Աթոռի կողմից հայտարարված դրամահավաքը Սուրբ Էջմիածնի հիմնանորոգման համար:
Ուշագրավ է նաեւ, որ փետրվարի 20-ին Նիկոլ Փաշինյանը համառորեն չհիշեց, որ լրանում է Արցախյան շարժման, Ազգային ազատագրական շարժման 32 ամյակը, ավելին, անգամ նույն օրը կայացած կառավարության նիստի ժամանակ այդ մասին չխոսեց, նկատելով, որ «գոլդ թիվ է» փետրվարի 20-ը:
Սա էլ մեր իրականությունը:
Հակոբ Ասատրյան
Top-News.am