Երեկ բանտից ազատ արձակված Վանո Մերաբիշվիլին հայտարարել է, որ վարչապետի պաշտոնում աշխատած մարդը չի աշխատի որպես նախարար
Վրաստանի նախկին վարչապետ Վանո Մերաբիշվիլին, մեկնաբանելով հետագայում իր հնարավոր աշխատանքը պետական բարձր պաշտոններում, հայտարարել է, որ վարչապետի պաշտոնում աշխատած մարդը չի աշխատի որպես նախարար: Այս մասին տեղեկացնում է pia.ge կայքը:
Մերաբիշվիլին նշել է, որ ինքը 2012 թվականին չէր ցանկանում վարչապետ դառնալ:
«2012 թվականին վարչապետ դառնալն անձնական ցանկությամբ չէր: Իմ ընկերները` Միխեիլ Սաակաշվիլին, Գիգի Ուգուլավան, Զուրաբ Ադեիշվիլին, Դաթո Տկեշելաշվիլին, Դավիթ Բաքրաձեն հավաքվեցին և որոշեցին, որ նախընտրական շրջանում, քանի որ իմ վարկանիշը բարձր էր, ինձ պետք է առաջադրել վարչապետի պաշտոնում: Ես համաձայնեցի` ելնելով ընկերության շահերից»,- հայտարարել է նախկին վարչապետը:
Ինչպես ավելի վաղ տեղեկացրել էր Tert.am-ը, փետրվարի 20-ին Վրաստանի նախկին վարչապետ և ներքին գործերի նախարար Վանո Մերաբիշվիլին ազատ է արձակվել բանտից:
2014 թվականին նա դատապարտվել էր 4 տարի 6 ամիս ազատազրկման` 2011 թվականի մայիսի 26-ի բողոքի ակցիան խափանելու համար: Այս գործով Վանո Մերաբիշվիլիին մեղադրանք էր առաջադրվել Վրաստանի քրեական օրենսգրքի 333-րդ հոդվածի բ և գ կետերով` բռնության կամ զենքի միջոցով իշխանության չարաշահում և անձանց ինքնասիրության վիրավորում:
Մերաբիշվիլին մեղավոր է ճանաչվել նաև պաշտոնեական լիազորությունների չարաշահման համար` օրենսգրքի 332-րդ և 341-րդ հոդվածներով, Սանդրո Գիրգվլիանիի գործով հանցանշանները թաքցնելու, Վալերի Գելաշվիլիի նկատմամբ ֆիզիկական հաշվեհարդարի և ընտրողներին կաշառելու գործերով:
Ընդհանուր առմամբ, բոլոր գործերով նա դատապարտվել էր 6 տարի 9 ամիս ժամկետով ազատազրկման:
Բացի նշված մեղադրանքներից` Մերաբիշվիլիի նկատմամբ հարուցված ևս մի քանի քրեական գործ կա: