32 տարի առաջ մեր կյանքը փոխվեց
32 տարի առաջ՝ 1988թ. փետրվարի 20-ին սկսվեց Արցախյան շարժումը կամ ազգային ազատագրական պայքարը: Անցել է 32 տարի, բայց տարօրինակ խորհրդավորությամբ այս օրը մեր պետության տոնացույցում չհայտնվեց:
Իսկ Արցախյան շարժումը մեզ տվեց անկախ պետություն, մեզ վերադարձրեց Արցախը՝ իր անվտանգության գոտով, մեզ տվեց երկիր, որտեղ այլեւս չկան շրջաններ եւ ենթաշրջաններ, որտեղ մեծամասնություն էին ադրբեջանցիները:
Արցախյան կամ ազգային ազատագրական շարժումը մեզ տվեց ամեն ինչ եւ այսօր մենք միմյանց պետք է միայն շնորհավորենք, չնայած անցած 32 տարվա ընթացքում ունեցել ենք նաեւ անհաջողություններ, եւ որ ամենակարեւորն է տարբեր պատճառներով բաց ենք թողել շատ ավելի բարձր զարգացման մակարդակում լինելու հնարավորությունը:
Դեռ ամեն ինչ կորած չէ, դեռ կարող ենք հետեւություններ անել, շարժվել առաջ, հաղթահարել ազգին բնորոշ բարդույթները, հաղթահարել նորանկախ երկրի բարդույթները, պոպուլիզմը, ատելությունը եւ շարժվել առաջ: Եթե մենք կարողացել ենք անկախ պետություն ունենալ, Արցախ ազատագրել, ապա մնացածը լուծելի խնդիրներ են:
Top-News.am