Այս ինչ շատ ենք սիրում մեր երեխաներին
Ամենաշատն իրենց երեխաներին սիրում են հայերը, իսկ ամենա-ամենաշատը Հայաստանում ապրող հայերը:
Չէ որ այդ միայն մենք ենք ընտրությունների արդյունքները կեղծում հանուն մեր երեխաների, եւ բակային տարածքներն էլ գարաժապատում կրկին հանուն մեր իսկ երեխաների:
Այդ միայն մենք ենք, որ հանուն մեր երեխաների կաշառք ենք տալիս եւ անվճար ընդունում համալսարաններ:
Միայն մենք ենք հանուն երեխաների նրանց ազատում բանակից եւ փախցնում ռուսաստաններ:
Չմոռանանք, որ հենց հանուն երեխաների ենք նրանց կաշառքով մանկապարտեզ ընդունում, իսկ հետո մանր-մունր կաշառք տալիս դաստիարակներին եւ ուսուցիչներին, ապա նաեւ դասախոսներին: Հավատացեք, միայն հանուն երեխաների:
Մենք մեր երեխաներին այնքան ենք սիրում որ ընտրակաշառք ենք վերցնում, բաժանում եւ սողում ղեկավարների առաջ:
Հանուն երեխաների կասեցնում ենք մեր երկրի զարգացումը եւ ամեն մի լավ առաջարկ եւ նախաձեռնություն ոտնատակ տալիս:
Հանուն երեխաների, ծխում ենք, նրանց կենացները խմում, տանը կռիվներ սարքում:
Կարճ ասած, ինչ անում ենք, երեխաների համար ենք անում:
Իսկապես, աշխարհում մեզնից ավելի երեխաներին սիրող չկա:
Լուսանկարում հայ երեխաներ չեն: մենք մեր երեխաներին այնքան ենք սիրում, որ չենք ստիպի այսպես ցատկել: Նրանք պետք է խորոված եւ քյաբաբ ուտեն, թե քաղաքում, թե բնության գրկում, թե լողափին:
Top-News.am