Ռուստամ Բադասյանի ներկայացրած հայցն ընդդեմ Նարեկ Մալյանի՝ թերի է համարվել. դատարանը հետ է ուղարկել հայցը
ՀՀ արդարադատության նախարար Ռուստամ Բադասյանը դատական հայց էր ներկայացրել ընդդեմ Նարեկ Մալյանի, սակայն հայցը թերի լինելու պատճառով դատարանն այն հետ է վերադարձրել: Այս մասին NEWS.am-ը տեղեկացավ Դատական-տեղեկատվական համակարգից:
Ռուստամ Բադասյանը դատական հայց է ներկայացրել ընդդեմ Նարեկ Մալյանի՝ պահանջելով պատվին, արժանապատվությանը եւ գործարար համբավին պատճառված վնասի հատուցում:
Երեւանի ընդհանուր իրավասության դատարանի դատավոր Զարուհի Նախշքարյանը հայցադիմումը վերադարձնելու մասին որոշում է կայացրել:
Տեղեկատվական համակարգում հրապարակված հաղորդագրության մեջ, մասնավորապես, ասվում է.
«ՀՀ Երեւան քաղաքի ընդհանուր իրավասության դատարանի դատավոր Զ.Նախշքարյանս, ուսումնասիրելով Ռուստամ Վարդանի Բադասյանի ընդդեմ Նարեկ Մալյանի` պատվին, արժանապատվությանը եւ գործարար համբավին պատճառված վնասի հատուցման պահանջի մասին, հայցադիմումը եւ կից փաստաթղթերը,պարզել է, որ չեն պահպանվել հայցադիմումի ձեւին, բովանդակությանը եւ կից փաստաթղթերին ներկայացվող պահանջները:
Հայցադիմումում թույլ տրված թերությունները կարող են վերացվել եւ դատարանին ներկայացվել եռօրյա ժամկետում»։
Այդ մասին ֆեյսբուքյան իր էջում գրառում է արել Նարեկ Մալյանը.
«Սկանդալ. Դատարանը որոշել է արդարադատության նախարարի իմ դեմ ներկայացրած հայցը հետ վերադարձնել:
Սորոսականների սիրելի հզոր իրավաբան Ռուստամ Բադասյանի հայցը դատարանը որոշեց վարույթ չընդունել, որովհետեւ (բռնվեք) արդարադատության նախարարի հայցը թերի էր....
Հիշեցնեմ, որ թերի հայց ներկայացրած մարդը այսօր մեր երկրում ճառում է իրավաբանությունից»։