Բա որ գումար չհավաքեն, միջոցառման փողն ո՞վ է տալու
Երեւանի քաղաքապետարանում կայացած աշխատանքային հերթական խորհրդակցության ժամանակ աշխատակազմի հանրակրթության վարչության պետը զեկուցել է, որ քաղաքապետարանի ենթակայության հանրակրթական դպրոցների ավարտական դասարաններում եւ մանկապարտեզների ավագ խմբերում շարունակվում է խիստ հսկողությունը՝ ավարտական միջոցառումների կազմակերպման նպատակով հնարավոր դրամահավաքության դեպքերը բացառելու ուղղությամբ:
Դժվար է ասել, թե հսկողությունն ինչպես է իրականացվում: Գուցե քաղաքապետարանը լրտեսական ցանց ունի, գուցե ինֆորմատորներ, բայց նրանք հաստատ վատ են աշխատում: Իրականությունն այն է, որ դրամահավաքները շարունակվում են կամ արդեն իսկ ավարտվել են:
Մյուս կողմից հարց է առաջանում, եթե աշակերտները, նրանց ծնողները գումար չհավաքեն, ապա ում փողով են միջոցառումն անելու: Ում գումարով են նկարահանելու հանդեսը կամ ձեւավորելու դահլիճը կամ վճարելու վինետկայի համար:
Եթե քաղաքապետարանը պատրաստ է հոգալ այդ ծախսերը,այլ հարց է, իսկ եթե ոչ, արդեն ժամանակն է վերջ տալ արդեն զավեշտի հասնող այս հայտարարություններին:
Top-News.am