«Գազպրոմը» կշարունակի 2020 թվականին գազ մատակարարել Հայաստանին նախկին պայմաններով
«Գազպրոմ էքսպորտ» ՍՊԸ-ն եւ «Գազպրոմ Արմենիա» ՓԲԸ-ն Հայաստանի Հանրապետություն ռուսական գազի մատակարարման համար պայմանագրին կից հավելյալ համաձայնագիր են ստորագրել: Այս մասին ասվում է «Գազպրոմի» հաղորդագրության մեջ:
«Համաձայնագրի համաձայն՝ 2020 թվականի հունվարի 1-ից Վրաստանի եւ Հայաստանի սահմանին գազի գինը կպահպանվի 2019 թվականի պայմաններով»,- ասվում է հաղորդագրության մեջ:
«Գազպրոմ էքսպորտ» ՍՊԸ-ի եւ «Գազպրոմ Արմենիա» ՓԲԸ-ի միջեւ տարեկան մինչեւ 2,5 մլրդ խորանարդ մետր ծավալով ռուսական գազի մատակարարման պայմանագիրը գործում է մինչեւ 2020 թվականի վերջ:
«Գազպրոմ Արմենիա» ՓԲԸ-ն հանդիսանում է «Գազպրոմ» ՀԲԸ 100-տոկոսանոց դուստր ընկերությունը, ապահովում է Հայաստանի Հանրապետության ներքին շուկայում բնական գազի մատակարարումն ու իրացումը: Ընկերությունն իրականացնում է նաեւ գազափոխադրում, պահեստավորում, բաշխում եւ իրացում, գործող գազափոխադրման եւ գազաբաշխման համակարգերի ու ստորգետնյա պահեստարանների վերակառուցում եւ ընդլայնում:
Լուրեր Հայաստանից - NEWS.am