Ի՞նչ են ուզում գյումրեցի կանայք

Հայաստանը տարեց տարի դատարկվում է: Քաղաքացիների արտահոսքը հատկապես երկրի սոցիալապես անապահով բնակավայրերից է: Այս առումով առաջատարներից է Գյումրին: Գյումրեցիները քաղաքը ժամանակավորապես կամ մշտական լքում են սոցիալական խնդիրների պատճառ: 

Այս անգամ գյումրեցի կանանցից հետաքրվեցինք, թե նրանք ի՞նչ փոփոխություններ են ցանկանում տեսնել Գյումրիում:

Ի դեպ նշենք, որ վերջին տարիներին, տղամադկանց զուգահեռ արտագնա աշխատանքի են մեկնում նաեւ կանայք: Հարցման արդյունքում պարզվեց, որ Գյումրիում բացակայում են տարրական անհրաժեշտության պայմանները: Խնդիրներ կան հասարակական տրանսպորտի եւ փողոցների գիշերային լուսավորության հետ կապված:

«Կուզեի ներքաղաքային տրանսպորտի աշխատանքը կանոնակարգվեր, շատրվանները, գոնե միայն այն, որի վրա աստղաբաշխական թվով գումար ծախսվեց, գործեր օրվա ընթացքում՝ ցերեկվա տապին: Գիշերները, գոնե միչեւ 23:00, փողոցները լուսավորվեին»,- ասաց մեր գեղեցկուհի զրուցակիցներից մեկը:

«Ուզում եմ շատ կանաչ տարածքներ լինեն Գյումրիում: Ավելի լավ կլիներ՝ այնպիսի մի կյանք ապահովեին, որ ծնելիությունը շատանար»,- նշեց մեկ այլ սիրունատես երիտասարդ կին:

Գյումրեցներից շատերն էլ կարծում են, որ պետք է քաղաքի արտաքին տեսքը բարեկարգել:

«Փոփոխություն ասվածը լայն շրջանակ ունի մեր քաղաքի համար։ Նախեւառաջ տրամադրությունն է պետք փոխել դեպի լավը։ Առաջնակարգ փոփոխությունը դա տնակների խնդրի վերացումը կլինի եւ նոր աշխատատեղերի բացումը: Ըստ ինձ, եթե դրանց հասնենք, արդեն ավելի լավ տրամադրվածություն կունենանք ու կանենք ավելին»,- ասաց մասնագիտությամբ իրավաբան կանանցից մեկը։

Գյումրեցի երիտասարդներից ոմանք էլ ցանկանում են, որ տեղական ինքնակառավարման մարմինների աշխատանքը դառնա թափանցիկ, որոշում կայացնելիս հաշվի առնվեն բնակիչների կարծիքները:

«Ուզում եմ, որ փոխվի քաղաքապետարանի ու համայնքապատկան կառույցների աշխատանքը: Այն դառնա թափանցիկ ու հասանելի: Դե պատկերացրեք, եթե թափանցիկ ու հասանելի աշխատեն, խնդիրները հեշտ ու արագ կլուծվեն, իսկ եթե անլուծելի է, գոնե պատճառը կհանրայնացվի, օրինակ՝ մեր թաղում թափառող շների մասին մեռա ում ասես դիմելով՝ մինչեւ կառավարություն: Կառավարությունը դիմումը փոխանցել էր քաղաքապետարան, որ իբր շները վերացված են, բայց՝ սուտ, ու բաժնի աշխատողները ու պետերն էլ չկան կամ էլ իրանք մենակ թղթաբանությունով են կարողանում զբաղվել»,- նշեց տնտեսագիտական համալսարանում սովորող ուսանողուհիներից մեկը:

Գյումրեցիների մյուս փոփոխությունների ցանկությունները կապված են աղբահեռացման, պատմամշակութային կոթողների վերականգման, կոմունալ խնդիրների լուծման, մինչեւ անգամ մարդկանց բնավորությունը փոխելու հետ:

«Կցանկանամ ուշադրություն լինի այն բանի վրա, որ մարդիկ չնախատեսված վայրերում աղբ են թափում»,- ասում է վարսահարդարներից մեկը:

«Ուզում եմ լինի ամենաանհրաժեշտ փոփոխությունը՝ վերանորոգեն մեր փողոցները»,- նշում է անբարեկարգ փողոցում բնակվող մի կին:

«Ես հին մարդ եմ, ուզում եմ, որ Գյումրին երկրաշարժից առաջվա Լենինականին նմանվի»,- ասաց տարեց կանանցից մեկը:

«Մեր քաղաքին պետք է սոցիալական վիճակի բարելավում՝ նոր ներդրողներ ներգրավելու, աշխատատեղեր ստեղծելու միջոցով: Պետական ավելի մեծ աջակցություն մասնավորներին, ազատ տնտեսական գոտի կամ նման մի բան, որ գան մեզ մոտ»,- ասում է մեր զրուցակիցներից մեկը:

«Նախեւառաջ, մեր քաղաքում փոփոխություններ տեղի ունենալու համար պետք է ազատվել երկերեսանի, եսասեր եւ կարիերիստ մարդկանցից, ովքեր իրենց թույլ կարողություններով հանդերձ կարող են շատ բարձր պաշտոններ զբաղեցնել՝ փչացնելով ամեն ինչ: Դա շատ կարեւոր է ոչ միայն մեր քաղաքի, այլեւ մեր երկրի համար: Նաեւ կցանկանայի, որպեսզի ՀՀ իշխանությունները ջանքեր գործադրեին Գյումրիում գործազրկության մակարդակը զգալիորեն նվազեցնելու, անօթեւանության հիմնախնդիրը վերջնականապես լուծելու համար: Հաճախ մենք չենք գնահատում այն, ինչ ունենք: Մեր պատմական ժառանգությունը պահպանելու համար անհրաժեշտ է հնարավորինս շուտ վերականգնել «Կումայրի» պատմական արգելոցում ընդգրկված շենք-շինությունները: Մեր քաղաքին լրացուցիչ գրավչություն կհաղորդեր կանաչ տարածքների ավելացումը»,- լսեցինք նաեւ այսպիսի կարծիք:

«Քանի որ մեր քաղաքը Հայաստանի ամենաաղքատ մարզերից մեկում է, կուզենայի գոնե ապահովված լիներ մինիմալ պայմաններով: Վերջին շրջանում բազմիցս տեսնում ենք, թե որքան ակտիվ ու բանիմաց են մեր երիտասարդները: Ու ամեն անգամ համոզվում, որ մեր քաղաքը ծաղկեցնողն ու սնողը իրենք են: Ուստի կառաջարկեի առաջին հերթին երիտասարդների ուսումնական ծրագրերի մշակում եւ համալսարան-գործատու կապի ստեղծում, որպեսզի կարողանանք բարձրացնել մեր կարծիքները, ուղիներ փնտրենք դրանց իրագործման համար, ավարտենք համալսարանը՝ աշխատելու, ոչ թե դիպլոմ ձեռքբերելու համար, մեր գիտելիքները ոչ թե արխիվացնենք, այլ կիրառենք ու նպաստենք մեր երկրի զարգացմանն ու ամրապնդմանը: Վերոհիշյալի շնորհիվ կփորձենք կանխել ուղեղների արտահոսքն ու էդ հոսքը կուղղենք մեր երկրի զարգացմանը, ու կնպաստենք գալիք սերնդի կյանքի գոնե բավարար մակարդակի ստեղծմանը»,- եզրափակեց մեր զրուցակիցներից մեկը:

Մի գեղեցկուհի աղջիկ էլ ասաց, թե երազում է այն մասին, որ գյումրեցի տղամարդիկ ոչ թե խոսքով քաջ լինեն, այլ իրականում, եւ լինեն անհամեմատ ավելի բարձր մակարդակի եւ ժամանակակից:

Ահա թե ինչ բան են ուզում գյումրեցի կանայք: Ընդամենը արժանապատիվ աշխատանք, ոչ այնքան բարձր աշխատավարձ, լուսավորված փողոցներ, շատրվան, մաքուր փողոցներ եւ քաղաքականապես գրագետ, կիրթ եւ համակրելի տղամարդիկ, ինչպես նաեւ քաղաքը եւ ժողովրդին սիրող իշխանություններ:

Դավիթ Գասպարյան

Գյումրի