Երևանի վարած արտաքին քաղաքականությունը կրում է հավասարակշռված բնույթ. Սերգեյ Լավրով
ՌԴ արտաքին գործերի նախարար Սերգեյ Լավրովը «Մեդիամաքս»-ին տված բացառիկ հարցազրույցում անդրադարձել է Հայաստանի ներքաղաքական վիճակին, սիրիական հարցի կարգավորմանն ու մի շարք այլ թեմաների: Անդրադառնալով հարցին՝ հայ-ռուսական հարաբերություններում կա՞ն արդյոք հարցեր կամ թեմաներ, որոնք իսկապես անհանգստացնում են Ռուսաստանի ղեկավարությանը:
«Իսկապես, 2018-ին ռուս-հայկական հարաբերությունները զարգանում էին Հայաստանում լուրջ ներքաղաքական փոփոխությունների ֆոնին: Հարկ է նշել, որ ՀՀ նոր իշխանությունները՝ վարչապետ Ն.Վ.Փաշինյանի գլխավորությամբ, ցուցաբերեցին լուրջ տրամադրվածություն համապարփակ դաշնակցային հարաբերությունների և համագործակցության ընդլայնման ամրապնդման ուղղությամբ, ինչպես երկկողմ, այնպես էլ ինտեգրացիոն ձևաչափերի շրջանակներում: Բարձրագույն և բարձր մակարդակով քաղաքական երկխոսության բարձր դինամիկան, միջգերատեսչական և միջխորհրդարանական կապերի ինտենսիվությունը դրա վկայությունն են: Այս տարի տեղի են ունեցել Ն. Վ. Փաշինյանի 4 հանդիպումները Ռուսաստանի Դաշնության նախագահ Վ.Վ.Պուտինի հետ: Նույնքան էլ՝ Ռուսաստանի Կառավարության նախագահ Դ. Ա. Մեդվեդևի հետ: Կառուցողական, վստահելի բնույթ կրող ռուս-հայկական բարձր մակարդակի երկխոսությունը նպաստում է երկկողմ օրակարգում առանցքային հարցերի արդյունավետ լուծմանը, թույլ է տալիս հիմքեր ձեւավորել ապագայի համար»,- ասել է նա: Լավրովը նշել է, որ Ռուսաստանը մնում է Հայաստանի առաջատար տնտեսական գործընկերը, իսկ Երևանի վարած արտաքին քաղաքականությունն, ըստ Լավրովի, կրում է հավասարակշռված, պատասխանատու բնույթ: