Գիտնականները ցույց են տվել երկարատեւ նստակյաց աշխատանքի հետեւանքները
Բրիտանացի գիտնականները ցույց են տվել երկարատեւ նստակյաց աշխատանքի հետեւանքները՝ Էմմա անունով կնոջ մոմե ֆիգուր ստեղծելով, հաղորդում է Lenta-ն:
Մոմե մոդելի ստեղծումից առաջ հետազոտողները հարցում են անցկացրել Ֆրանսիայից, Գերմանիայից եւ Մեծ Բրիտանիայից մոտ 3 հազար գրասենյակային աշխատակիցների շրջանում եւ պարզել, թե առողջական ինչ խնդիրներ են նրանց անհանգստացնում: Հարցվածների կեսը բողոքել է աչքերի ցավից, 49 տոկոսը՝ մեջքի ցավից, 48-ը՝ գլխացավից:
Արդյունքում Էմմա մոմե ֆիգուրի մոտ տեսանելի են եղել աշխատանքի ժամանակ սխալ դիրքի պատճառով կեցվածքի խախտումները, երակների վարիկոզ լայնացումը, կլորացած որովայնն ու ուռչած կոճերը՝ ֆիզիկական ակտիվության պակասի պատճառով, գունատ եւ բորբոքված մաշկը՝ արեւի լույսի պակասի պատճառով, ինչպես նաեւ չոր եւ կարմրած աչքերը՝ համակարգչի առջեւ երկար աշխատելու պատճառով:
Հետազոտության հեղինակ Ուիլյամ Հայեմի խոսքով՝ այդպիսով ինքը ցանկացել է ուշադրությունը հրավիրել գրասենյակային աշխատակիցների առողջության հարցին ու նշել աշխատանքի պայմանները փոխելու անհրաժեշտության մասին: «Եթե մենք մեր աշխատանքային կյանքում արմատական փոփոխություններ չմտցնենք, ապա կհիվանդանանք»,- եզրափակել է նա: