Պուջդեմոնը Բրյուսելում կամավոր ներկայացել է ոստիկանություն
Բարսելոնայում շարունակվում են բողոքի ակցիաները:
Կատալոնիայի անջատականների առաջնորդ, Բելգիայում ապաստանած Կարլես Պուջդեմոնն այսօր Բրյուսելում կամավոր ներկայացել է ոստիկանություն այն բանից հետո, երբ Իսպանիան արձակել է նրան ձերբակալելու նոր միջազգային հրամանագիր:
Պուջդեմոնի գրասենյակը հայտնել է, որ կատալոնացիների լիդերը ոստիկանություն է ներկայացել փաստաբանների ուղեկցությամբ:
Պուջդեմոնը կտրականապես դեմ է իր արտահանձնմանը Իսպանիա: Առայժմ հայտնի չէ, թե ինչ որոշում կկայացնեն Բելգիայի իրավապահները:
Մինչդեռ, Կատալոնիայի մայրաքաղաք Բարսելոնայում շարունակվում են բողոքի զանգվածային ակցիաները:
Կատալոնացիները պահանջում են ազատ արձակել անջատողական գործունեության համար Իսպանիայի Գերագույն դատարանի վճռով ազատազրկման դատապարտված լիդերներին:
2017 թվականին Կատալոնիան անկախության հանրաքվե է անցկացրել, սակայն Մադրիդը չի ճանաչել դրա արդյուքները:
Ցույցերը չորրորդ օրն են շարունակվում: Երեկվա ակցիան, որին մասնակցել են հազարավոր կատալոնացիներ, խաղաղ է մեկնարկել, սակայն հետագայում ցուցարարների մի խումբ սկսել է հրկիզել սրճարանների սեղանները, աթոռները և աղբամանները:
Արհմիությունները Կատալնիայում այսօր համընդհանուր գործադուլ անցկացնելու կոչ են արել: