Ամեն տարի չենք կարող ստվերից 62 մլրդ դրամ գերավճար ապահովել. պետք է տնտեսությունն աճի. Դավիթ Անանյան
Այս տարի 62 մլրդ դրամի հարկային եկամուտների գերակատարման տակ կային որոշակի գնահատականներ. նաեւ կար հետհեղափոխական շրջանում հարկ վճարողների վարքագծի փոփոխման ակնկալիք: Այս մասին, այսօր՝ հոկտեմբերի 16-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը:
«Ամեն տարի նման վարքագիծ ապահովելը դժվար է: Եթե մարդը որոշել է, որ պետք է կանգնի ճիշտ ճանապարհի, ինքը մեկ անգամ է դա անում, այնպես չի, որ ամեն տարի պետք է ճիշտ ճանապարհի կանգնի: Հետեւաբար հետհեղափոխական շրջանում ստվերից բերված հարկերի ծավալները հետագա տարիներին չենք կարող ապահովել: Շատ կարեւոր է, որ տնտեսությունն աճի: Մենք հիմքում դրել ենք, որ 2020 թվականին կունենանք 7 տրլն դրամի ՀՆԱ: Եթե դա մենք ունենանք, ապա կարծում եմ՝ կունենանք այն հարկային եկամուտները, որը կանխատեսել ենք: Տնտեսությունը պետք է աճի, որ հարկեր գեներացնի»,-ասաց Անանյանը:
Նա նաեւ հավելեց, որ անընդհատ վարչարարությամբ եւ ստվերից չեն կարող նման ցուցանիշներ ունենալ, կամ դա կլինի «կառավարելի» ստվեր. «Արդյունաբերություն, առեւտուր եւ հանքարդյունաբերություն. Այս երեքը կլինեն դոմինանտ ճյուղերը, որ կապահովեն տնտեսության զարգացումը եւ հարկային եկամուտներ: Իսկ օրինակ, ավտոմեքենաների ներկրման բումը հաջորդ տարիներին հաստատ այդ ծավալներով չի լինելու: Մեր գնահատմամբ, մոտ 50-55 մլրդ դրամ մենք հաջորդ տարի չենք ունենալու»,-ասաց ՊԵԿ նախագահը: