Էլինար Վարդանյան. «Հակակշիռների մեխանիզմի դեմ պայքարը ամենավտանգավոր երեւույթն է»
Հյուրընկալվելով «Yerevan.today»-ի տաղավարում, «Այլընտրանքային նախագծեր խմբի» անդամ Էլինար Վարդանյանը պատասխանելով դատական համակարգը վիրահատական միջոցներով կարգի բերելու մասին Նիկոլ Փաշինյանի արած հայտարարությանը վերաբերող հարցին, շեշտել է, որ բարեփոխումները հայտարարություններով չեն անում:
Ավելին, Էլինար Վարդանյանն ընդգծեց, որ դատական որոշում կայացնելուց հետո դատավորի նկատմամբ սկսված հետապնդումը բոլորովին չի վկայում իրական բարեփոխում անցկացնելու իշխանությունների մտադրության մասին:
«Բարեփոխումը համակարգային փոփոխությունն է, եւ ոչ Սահմանադրական դատարանի դատավորին օրենքով առաջարկվող կաշառքը՝ թոշակի տեսքով: Այս պարագայում հարց է առաջանում, թե այս ճնշման պայմաններում որեւէ մեկը կհամարձակվի՞ ներդրում կատարել Հայաստանում, իհարկե՝ ոչ»,- ասել է Վարդանյանը:
Նա նաեւ հռետորական հարցադրումներ է արել. որեւէ հակակշիռ չպե՞տք է լինի այսօրվա իշխանություններին, չպե՞տք է լինի որեւէ մարմին, որը կտա հստակ գնահատական, թե իշխանությունների ընդունած օրենքները համապատասխանում են Սահմանադրությանը, թե ոչ, չպե՞տք է լինի որեւէ մարմին, որը կորոշի, թե այսօրվա պետական մարմինների գործունեությունն իրավունքի շրջանակում են, թե ոչ:
«Հակակշիռների մեխանիզմը չպետք է խախտվի, քանի որ հակառակ պարագայում մենք կգնանք մեկ հոգու դատարանի: Մեկ հոգի ինչպես կորոշի, այնպես էլ դատարանը կորոշի: Հետեւաբար հակակշիռների մեծանիզմների դեմ պայքարն ամենավտանգավոր երեւույթն է»,- վստահ է Էլինար Վարդանյանը:
Top-News.am