Գյուլենի 22 կողմնակից Թուրքիայից Հունաստան է փախել և ապաստան խնդրել. լրատվամիջոցներ
Քսաներկու անձ, որոնք իրենց հայտարարել են թուրք կրոնական քարոզիչ Ֆեթհուլլահ Գյուլենի կազմակերպության աջակիցներ, Թուրքիայից փախչելով, ապաստան են հայցել Հունաստանից, հայտնում է ՏԱՍՍ լրատվական գործակալությունը՝ հղում կատարելով հունական newpost.gr-ին:
Ըստ ՏԱՍՍ-ի՝ 2019թ. օգոստոսին Թուրքիայի ԶՈՒ սպաներից մեկը ժամանել է հունական Կալիմնոս կղզի և հանձնվել տեղի իշխանություններին, որից հետո 22 թուրք նույնպես այդ կղզի է ժամանել: Նրանք բոլորն էլ իրենց փախուստը պատճառաբանել են այն հանգամանքով, որ հանդիսանում են Ֆեթհուլլահ Գյուլենի կազմակերպության աջակիցներ և ստիպված են եղել լքել Թուրքիան, քանի որ այնտեղ Էրդողանի ռեժիմի կողմից նրանց բանտարկություն է սպառնում:
Այդ անձանց ժամանակավոր կացություն է տրամադրվել, քանի դեռ քննվում են նրանց ապաստան տրամադրելու դիմումները:
Հիշեցնենք, որ նախկինում Հունաստանը հրաժարվել է Թուրքիային հանձնել Ֆեթհուլլահ Գյուլենի կազմակերպության աջակիցներին, պատճառաբանելով, որ Թուրքիայում նրանց նկատմամբ արդար դատաքննություն չի իրականացվելու, և նրանց սպասվում են կտտանքներ և մահ:
2016թ. հուլիսի 15-ին Թուրքիայում տեղի է ունեցել ռազմական հեղաշրջման փորձ, որի համար Թուրքիայի ներկայիս վարչակարգը մեղադրում է Ֆեթհուլլահ Գյուլենին և «ՖԵԹՕ» կոչվող կազմակերպությանը, մինչդեռ այդ կազմակերպության աջակիցների նկատմամբ կայացված որոշումների իրավաչափության խնդիրը բազմաթիվ հարցեր է առաջացրել միջազգային հանրության շրջանում: