Եվրախորհրդարանը պատրաստ է կրկին հետաձգել Brexit-ի գործընթացը
Եվրախորհրդարանն առաջարկում է կրկին հետաձգել Եվրամիությունից Մեծ Բրիտանիայի դուրս գալու ժամկետները։ Այս մասին հայտարարել է Եվրախորհրդարանի ղեկավար Դավիթ Սասոլին։
Նրա խոսքով՝ Եվրախորհրդարանը համապատասխան բանաձև է մշակում։
«Բանաձևում նշված է լինելու, որ Եվրախորհրդարանը պատրաստ է հնարավոր հետաձգմանը, եթե դա կօգնի խուսափել առանց համաձայնագրի Եվրամիությունից դուրս գալուն կամ անհրաժեշտ է Մեծ Բրիտանիայում համընդհանուր ընտրություններ անցկացնելու համար»,- հայտնել է Եվրախորհրդարանի ղեկավարը։
Ընդ որում, Սասոլին ընդգծել է, որ Լոնդոնի և Բրյուսելի միջև համաձայնագիրն առանց «բեքստոպի» (Իռլանդիայի և Հյուսիսային Իռլանդիայի միջև սահմանի համար ապահովագրական պլան) մեխանիզմի անհնար է:
«Բանաձևը հստակ ահազանգ կլինի առ այն, որ համաձայնագիրն անհնար է առանց «բեքստոպի»։ Սա Եվրահանձնաժողովի, ԵՄ ինստիտուտների, այդ թվում՝ Եվրախորհրդարանի դիրքորոշումն է, որը վերջնական է։ Մենք ցանկանում ենք համաձայնագիր, բայց նաև հասկանում ենք, որ այն չի կարող լինել առանց «բեքստոպի»»,- ընդգծել է Սասոլին։