«Դա ամերիկացիների ներքին գործն է»․ Կրեմլը մեկնաբանել է Բոլտոնի աշխատանքից հեռանալը
Կրեմլը համարում է, որ ԱՄՆ ազգային անվտանգության հարցերով խորհրդական Ջոն Բոլտոնի աշխատանքից հեռանալը այդ երկրի ներքին գործն է, այս մասին հայտնել է ՌԴ նախագահի մամուլի խոսնակ Դմիտրի Պեսկովը «ՌԻԱ Նովոստի» գործակալությանը։
«Դա ամերիկացիների ներքին գործն է»,- պատասխանել է Պեսկովը այն հարցին՝ արդյո՞ք Կրեմլում Բոլտոնի աշխատանքից ազատվելը կապում են ԱՄՆ-ում նոր հետախուզական սկանդալի հետ։
Ավելի վաղ CNN հեռուստաալիքը, հղում կատարելով ԱՄՆ վարչապարատի աղբյուրներին, հաղորդել է, որ ԱՄՆ հատուկ ծառայությունները գաղտնի օպերացիաների շրջանակում 2017թ․ ՌԴ-ից իրենց տեղեկություն հաղորդողին էին դուրս հանել, ով մոտ է եղել ռուսական իշխանություններին։ ԶԼՄ-ների համոզմամբ՝ սա կատարվել էր ՌԴ արտաքին գործերի նախարար Սերգեյ Լավրովի և ԱՄՆ-ում այդ ժամանակվա ՌԴ դեսպան Սերգեյ Կիսլկայի՝ ԱՄՆ նախագահ Թրամփի հետ հանդիպումից հետո։
Ավելի վաղ Tert.am-ը հայտնել էր Թրամփի հայտարարության մասին առ այն, որ աշխատանքից հեռացրել է ազգային անվտանգության հարցերով խորհրդական Ջոն Բոլթոնին:
«Անցյալ գիշեր տեղեկացրել եմ Բոլթոնին, որ իր ծառայությունների կարիքը Սպիտակ տունն այլևս չունի: Ես կտրականապես համաձայն չեմ նրա առաջարկներից շատերի հետ, ինչպես և վարչակազմի այլ աշխատակիցներ նույնպես: Այդպիսով, խնդրել եմ Ջոնին հրաժարական տալ, ինչը նա արել է այսօր առավոտյան: Ազգային անվտանգության հարցերով նոր խորհրդականին կնշանակեմ հաջորդ շաբաթ»,- ասվում է ԱՄՆ առաջնորդի գրառման մեջ: